Rajanand More
अमेरिकेचे राष्ट्राध्यक्ष डोनाल्ड ट्रम्प यांचा मुलगा बॅरन ट्रम्प याला जीवे मारण्याची धमकी देण्यात आली आहे. इराणच्या सरकारी दूरचित्रवाणीवर एक वादग्रस्त व्हिडिओ प्रसारित करण्यात आल्याचा दावा आहे.
व्हिडिओमध्ये बॅरन यांच्याबाबत माहिती देण्यात आली असून, १० दशलक्ष डॉलर म्हणजेच ९५ कोटी अधिक रुपयांचे बक्षीस जाहीर करण्यात आल्याचे वृत्त आहे.
प्रसारित व्हिडिओमध्ये २० वर्षीय बॅरन यांच्या हालचालींचे वर्णन तसेच दृश्ये दाखवण्यात आली आहेत. ते निगराणीखाली असल्याचा दावा व्हिडिओत करण्यात आला आहे.
एका मुलीने अमेरिकन सीक्रेट सर्व्हिसची सुरक्षा भेदून एका खासगी बैठकीत बॅरन यांच्या शेजारी बसल्याचा दावाही या व्हिडिओत करण्यात आल्याने अमेरिकेला धक्का बसला आहे.
अमेरिका आणि इराणमधील संघर्षाच्या पार्श्वभूमीवर हा व्हिडिओ प्रसारित झाल्याने खळबळ उडाली आहे. डोनाल्ड ट्रम्प यांच्याकडून सातत्याने इराणवर हल्ला करण्याची धमकी दिली जात आहे.
इराणचा व्हिडिओ प्रसारित झाल्यानंतर अमेरिकेने आक्रमक भूमिका घेतल्याचे समजते. इराणवर कडक निर्बंध लादण्यासोबतच लष्करी कारवाईचेही संकेत दिले जात आहेत.
बॅरन ट्रम्प हा डोनाल्ड ट्रम्प आणि मेलानिया यांचा मुलगा आहे. तो वडिलांच्या राजकीय जीवनापासून चार हात दूर असल्याचे सांगितले जाते.
डोनाल्ड ट्रम्प हे उद्योजक असून त्यांच्याच पावलावर पाऊल टाकण्यासाठी बॅरनही उत्सुक आहे. महाविद्यालयीन शिक्षण घेत असलेल्या बॅरनने काही महिन्यांपूर्वीच एक कंपनीही सुरू केली आहे.