सरकारनामा ब्यूरो
महिला व बालविकास विभागांतर्गत एकात्मिक बालविकास सेवा योजनेअंतर्गत राज्यातील मिनी अंगणवाडी सेविका, मदतनीस यांना मुख्यमंत्री एकनाथ शिंदे यांच्या हस्ते नियुक्तीपत्रे प्रदान करण्यात आली.
सह्याद्री अतिथीगृह येथे मंगळवारी महिला व बालविकास विभागाच्या एकात्मिक बाल विकास सेवा योजनेंतर्गत हा कार्यक्रम पार पडला.
भरती प्रक्रियेद्वारे १९ हजार ५७७ अंगणवाडी सेविका नवनियुक्त झाल्या आहेत.
राज्यातील अंगणवाडी सेविका, मदतनीस यांच्यापैकी मुंबई शहर, उपनगर आणि ठाणे जिल्ह्यातील ५८ अंगणवाडी कर्मचारी यांना प्रातिनिधिक स्वरूपात नियुक्तीपत्र प्रदान करण्यात आले.
या कार्यक्रमात मुख्यमंत्री एकनाथ शिंदे, उपमुख्यमंत्री अजित पवार, महिला व बालविकास मंत्री आदिती तटकरे हे उपस्थित होते.
महिला व बालविकास विभागाचे सचिव डॉ.अनुपकुमार यादव, एकात्मिक बाल विकास सेवा योजनेच्या आयुक्त रूबल अग्रवाल, महिला व बालविकास आयुक्त डॉ. प्रशांत नारनवरे, महिला व आर्थिक विकास महामंडळाच्या व्यवस्थापकीय संचालक डॉ. इंदू जाखड, स्माईल फाऊंडेशनच्या संचालक उमा आहुजा व धीरज आहुजा, मुंबई शहर, उपनगर आणि ठाणे जिल्ह्यातील ५८ नवनियुक्त अंगणवाडी कर्मचारी, अधिकारी उपस्थित होते.
महिलांच्या सर्वांगीण विकासासाठी लवकरच चौथ्या महिला धोरणाची राज्यात अंमलबजावणी होणार आहे. अशी घोषणा मुख्यमंत्री एकनाथ शिंदे यांनी केली.
अंगणवाडी कर्मचारी हे फक्त पोषण आहार देणे व बालकांचे संगोपन करणे एवढेच काम करत नसून सुदृढ बालक आणि सक्षम पिढी घडविण्याचे काम करत असतात. अशी प्रतिक्रिया आदिती तटकरे यांनी या कार्यक्रमात केली.
राज्यातील प्रत्येक बालक सुदृढ होण्यासाठी अंगणवाडी कर्मचारी अत्यंत प्रामाणिकपणे काम करतात. त्यांना पाठबळ देण्यासाठी शासन प्रयत्नशील राहील, अशी ग्वाही यावेळी दिली.