Rashmi Mane
महाराष्ट्रातील वाहनमालकांसाठी मोठी दिलासा देणारी बातमी समोर आली आहे. राज्य परिवहन विभागाने हाय-सिक्युरिटी नंबर प्लेट (HSRP) बसवण्याची अंतिम तारीख पुन्हा एकदा वाढवली आहे.
आता नवीन डेडलाइन 31 डिसेंबर अशी जाहीर करण्यात आली असून, ही मुदत वाढ सलग पाचव्यांदा देण्यात आली आहे. तरीदेखील मोठ्या प्रमाणात वाहनांवर अद्याप HSRP बसवणे बाकी आहे.
1 एप्रिल 2019 पूर्वी नोंदणी झालेल्या सर्व वाहनांसाठी HSRP लावणे अनिवार्य करण्यात आले आहे. यामागील उद्दिष्ट म्हणजे अपघात किंवा गुन्ह्यात सहभागी वाहनांचा शोध लागणे अधिक सोपे व्हावे.
या प्लेटमुळे प्रत्येकाची गाडी सुरक्षित राहावी. या नंबर प्लेटमध्ये विशेष सुरक्षा तंत्रज्ञान वापरलेले असल्याने वाहन ओळखणे, ट्रॅक करणे आणि तपासात मदत मिळणे अधिक सोपे होते.
पुण्यात HSRP बसवण्याचा वेग अद्याप समाधानकारक नाही. शहरातील सुमारे 25 लाखांहून अधिक वाहनांना या प्लेट्स बसवायच्या आहेत. यापैकी आतापर्यंत साडेसात लाख वाहनांवरच HSRP बसवण्यात आले आहेत.
सुमारे साडेदहा लाख वाहनमालकांनी रजिस्ट्रेशन केले असले तरी प्रत्यक्षात अजूनही मोठ्या प्रमाणात वाहनांवर प्लेट बसवायची बाकी आहे. अंदाजे 15 लाखांपेक्षा अधिक वाहनांमध्ये अजूनही HSRP बसवल्या गेलेल्या नाहीत.
परिवहन विभागाने वारंवार संधी देऊनही अनेकांनी दुर्लक्ष केल्याचे दिसत आहे. सध्या HSRP नसलेल्या वाहनांचे काही काम RTO कार्यालयातही प्रलंबित ठेवले जात आहे. आता विभागाने स्पष्ट सूचना दिल्या आहेत.
31 डिसेंबरनंतर HSRP नसलेल्या वाहनांवर दंडात्मक कारवाई केली जाईल. त्यामुळे वाहनमालकांनी शेवटच्या क्षणाची वाट न पाहता तातडीने HSRP बसवून घ्यावी, असे आवाहन करण्यात येत आहे.