Deepak Kulkarni
कोथरूड विधानसभा मतदारसंघाच्या माजी आमदार मेधा कुलकर्णी यांना भाजपने राज्यसभेवर संधी दिली आहे.
राज्यसभेची निवडणूक बिनविरोध झाल्याने कुलकर्णी यांच्या गळ्यात खासदारकीची माळ सहज पडली.
राज्यसभा सदस्यांचा शपथविधी सोहळा बुधवारी (ता.3) उपराष्ट्रपती जगदीप धनखड यांच्या उपस्थितीत पार पडला.
यावेळी त्यांनी संस्कृत भाषेमधून राज्यसभा सदस्यत्वाची शपथ घेतली.
यंदा राज्यसभा निवडणुकीसाठी महाराष्ट्रातून भाजपच्या वतीने माजी मुख्यमंत्री अशोक चव्हाण,पुण्यातील माजी आमदार मेधा कुलकर्णी, अजित गोपछडे यांना उमेदवारी दिली गेली आणि या तिघांचीही राज्यसभेवर वर्णी लागली.
मेधा कुलकर्णी यांनी शपथविधीनंतर आपल्या भावना सोशल मीडियावर पोस्टद्वारे व्यक्त केल्या आहेत.
फेसबुक पोस्टमध्ये त्या म्हणतात, 'मला कळवताना अत्यंत आनंद होत आहे की, आज सभागृहाचे आदरणीय अध्यक्ष, उपराष्ट्रपती जगदीप धनखड यांच्या उपस्थितीत मला राज्यसभेची खासदार म्हणून संस्कृतमध्ये शपथ घेण्याचा मान मिळाला.
राज्यसभा सदस्य म्हणून मी आज संस्कृत भाषेतून शपथ घेताना खूप भारावून गेले.
'मी अतिशय कृतज्ञ आहे म्हणत पंतप्रधान नरेंद्र मोदी, गृहमंत्री अमित शाह, भाजप अध्यक्ष जे.पी.नड्डा, उपमुख्यमंत्री देवेंद्र फडणवीस, प्रदेशाध्यक्ष चंद्रशेखर बावनकुळे यांचे संधी दिल्याबद्दल मेधा कुलकर्णी यांनी आभारही मानले.