Amit Ujagare
दिल्लीत २६ जानेवारी अर्थात प्रजासत्ताकदिनी कर्तव्यपथावर आपल्या सैन्यदलाची ताकद दाखवली जाते. यामध्ये सैन्याच्या विविध तुकड्यांकडून परेडद्वारे मानवंदनाही दिली जाते.
यामध्ये CRPF अर्थात केंद्रीय राखीव पोलीस बलाच्या तुकडीचं नेतृत्व यंदा २६ वर्षांच्या सीआरपीएफची महिला अधिकारी सिमरन बाला करणार आहेत.
इतक्या कमी वयात सिमरन १५० पुरुषांच्या या तुकडीचं नेतृत्व करणार आहेत. यासाठी त्यांचं सर्वत्र कौतुक होत आहे. यातून एक तगडा संदेशही दिला गेला आहे. या सिमरन बाला कोण आहेत? पाहुयात.
सिमरन बाला (वय २६) या मुळच्या जम्मू-काश्मीरच्या राजौरी जिल्ह्यातील नौशेरा इथल्या रहिवासी आहेत. त्या सध्या सीआरपीएफमध्ये सहाय्यक कमांडंटपदावर कार्यरत आहेत.
जून २०२३ मध्ये त्यांची युपीएससीतून CAPF साठी निवड झाली, त्यांना ८२ वी रँक मिळाली होती. त्यावेळी त्या फक्त २३ वर्षांच्या होत्या. जम्मू-काश्मीरच्या त्या पहिल्या महिला आहेत ज्यांनी ही परीक्षा पास केली आहे.
सिमरन यांचं प्राथमिक शिक्षण हे राजौरी जिल्ह्यातच झालं. त्यानंतर त्यांनी जम्मूमध्ये पुढील शिक्षण घेतलं, पदवीचं शिक्षण त्यांनी गांधीनगरच्या सरकारी महिला कॉलेजमधून पूर्ण केलं.
कॉलेजच्या शेवटच्या सेमिस्टरमध्ये असताना त्यांनी UPSC-CAPF परीक्षेची तयारी सुरु केली, पहिल्याच प्रयत्नात त्यांनी ही परीक्षा पासही केली.
त्यानंतर सिमरन बाला यांची २०२५ मध्ये CRPF मध्ये नियुक्ती करण्यात आली, इथं त्यांची छत्तीसगडच्या बस्तरिया बटालियनमध्ये नियुक्ती झाली. इथं नक्षलविरोधी अभियानाची जबाबदारी त्यांच्यावर सोपवण्यात आली.