Rashmi Mane
लोकसभा निवडणुकीनंतर सध्या लोकसभेचे पहिले अधिवेशन सुरु आहे.
नवनिर्वाचित लोकसभा सदस्यांचा शपथविधी आणि सभापती निवडीनंतर राष्ट्रपती द्रौपदी मुर्मू यांनी आज दोन्ही सभागृहातील अधिवेशनाला संबोधित केले.
अधिवेशन चालू असतांना संसदेत स्थापन झालेल्या सेंगोलवरून राजकारण तापले आहे. आता हा मुद्दा पुन्हा चर्चेत आला आहे. राष्ट्रपती द्रोपदी मुर्मू येतांना त्यांच्या सोबत सेंगोल आणले गेले आणि संसद भवनात सभापतींच्या आसनाजवळ ठेवण्यात आले.
त्यामुळे आता सेंगोल हटवण्याची मागणी विरोधी पक्षांनी सुरू केली आहे. समाजवादी पक्षाने (एसपी) सेंगोलला राजेशाहीचे प्रतीक म्हटले आहे आणि ते काढून टाकून त्या जागी राज्यघटना स्थापन करण्याची मागणी केली आहे.
त्याचे कारण म्हणजे पंतप्रधान मोदींच्या नेतृत्वाखालील भाजप सरकारने संसदेत 'सेंगोल' स्थापन केले. 'सेंगोल' म्हणजे ''राज-दंड', याचा अर्थ 'राजाची काठी' असाही होतो.
राजेशाही संपवून देश स्वतंत्र झाला. देश 'राजाच्या दंडाने' चालणार की संविधानाने? संविधान वाचवण्यासाठी सेंगोल यांना संसदेतून हटवावे, अशी माझी मागणी आहे. असे म्हणत राज्यसभा खासदार आर.के. चौधरी यांनी जोरदार विरोध केला.
सेंगोल हटवून भारताचे संविधान संसदेत स्थापन करावे अशी मागणी यावेळी करण्यात आली.