Deepak Kulkarni
राष्ट्रवादी काँग्रेसचे अध्यक्ष शरद पवार हे आपला शब्द पाळण्यासाठी ओळखले जातात.
त्यांनी कोणाला शब्द दिला तर मग ते कोणत्याही परिस्थितीत तो पूर्ण करतात.
शरद पवार हे रविवारी (दि.७) सोलापूर दौऱ्यावर आले होते.
पवार यांच्या उपस्थितीत साखर सम्राट म्हणून नव्याने उदयास आलेल्या अभिजीत पाटील यांनी पंढरपूर येथे राष्ट्रवादीत प्रवेश केला.
शरद पवारांनी सोलापुरातील आपल्या सहकाऱ्याला दिलेला शब्द पाळला आणि त्याच्या भर पावसात त्याच्या नातेवाईकाच्या लग्नाला उपस्थित राहिले.
यावेळी देखील भरपावसात शरद पवारांनी लग्नाला हजेरी लावल्याने त्यांच्या या कृतीची सर्वत्र चर्चा केली जात आहे.
सोलापूरचे राष्ट्रवादीचे माजी महापौर मनोहर पंत सपाटे यांच्या पुतण्याचा विवाह सोहळा रविवारी पार पडला.
या विवाह सोहळ्यासाठी राष्ट्रवादीचे सर्वेसर्वा शरद पवार हे उपस्थित राहणार होते. मात्र, अचानक लग्न सोहळ्यादरम्यान पाऊस सुरू झाला. मात्र भर पावसात शरद पवार यांचे आगमन झाले.
यापूर्वी साताऱ्यात भरपावसातली शरद पवार यांची सभा गाजली होती.
राजीनामा नाट्यानंतर शरद पवार यांचा सोलापुरात पहिलाच दौरा होता. पंढरपूर आणि सांगोल्यात दिवसभर दौरा करून शरद पवार सोलापुरात आले होते.