Vijaykumar Dudhale
नितीन गडकरी यांच्याकडे त्यांचे आवडीचे रस्ते वाहतूक आणि महामार्ग मंत्रालय पुन्हा सोपविण्यात आले आहे. यापूर्वीही ते त्यांच्याकडे होते.
पियूष गोयल यांच्याकडेही यापूर्वी असलेले वाणिज्य मंत्रिपद पुन्हा देण्यात आलेले आहे. या वेळी वाणिज्यसोबत उद्योग मंत्रालयाचा भारही त्यांच्यावर असणार आहे.
रामदास आठवले यांना केंद्रीय मंत्रिमंडळात राज्यमंत्री म्हणून पुन्हा एकदा संधी देताना त्यांच्या सामजिक न्याय आणि सबलीकरण विभाग देण्यात आलेला आहे. मागील पंचवार्षिकमध्ये हेच मंत्रालय आठवलेंकडे होते.
रावेरच्या खासदार रक्षा खडसे यांच्याकडे युवक कल्याण आणि क्रीडा विभागाचे राज्यमंत्रिपद देण्यात आलेले आहे.
पुण्याचे खासदार मुरलीधर मोहोळ यांना सहकार आणि नागरी हवाई वाहतूक मंत्रालयाचे राज्यमंत्रिपद सोपविण्यात आलेले आहे.
शिवसेनेचे खासदार प्रतापराव जाधव यांच्याकडे आयुष, आरोग्य व कुटुंबकल्याण मंत्रालयाचा कारभार सोपविण्यात आला आहे. ते या खात्याचे स्वतंत्र कार्यभार असलेले राज्यमंत्री आहेत.
मूळचे जळगावचे मात्र गुजरातमधील नवसारीमधून निवडून आलेले भाजपचे प्रदेशाध्यक्ष चंद्रकांत पाटील ऊर्फ सी. आर. पाटील यांच्याकडे जलशक्ती मंत्रालय असणार आहे.
ज्योतिरादित्य सिंधिया यांचे पूर्वज हे महाराष्ट्रातील आहेत. ते मध्य प्रदेशातील गुना लोकसभा मतदारसंघातून निवडून आले आहेत. त्यांच्याकडे दूरसंचार आणि ईशान्य भारत विकास मंत्रालयाची कमान असणार आहे.