Amit Ujagare
महाराष्ट्राचे मुख्य सचिव म्हणून आयएएस अधिकारी राजेश मीना यांनी सोमवारी पदभार स्वीकारला. मावळत्या मुख्य सचिव सुजाता सौनिक यांनी त्यांचं स्वागत केलं.
मुख्य सचिव असलेले राजेश मीना यांच्याबद्दल माहिती नसलेल्या काही गोष्टी जाणून घेऊयात.
राजेश मीना हे मूळचे राजस्थानमधल्या सवाई माधोपूरचे असून सामान्य कुटुंबातून आले आहेत. महाराष्ट्रातल्या अनेक जिल्ह्यात त्यांनी जिल्हाधिकारी आणि मंत्रालयातही विविध पदांवर काम केलं आहे.
राजेश मीना हे माजी केंद्रीय मंत्री आणि भाजप नेत्या जसकौर मीना यांचे जावई असून त्यांची मुलगी अर्चना मीना यांच्याशी त्यांचा विवाह झाला आहे.
राजेश मीना यांच्या पत्नी अर्चना मीना या हॉटेल व्यावसायिक आहेत. तसंच समाजसेवेतही त्या अग्रेसर असतात.
राजेश मीना हे अत्यंत निश्चयी अधिकारी असून आपला निर्णय ते सहजासहजी बदलत नाहीत, अशी त्यांची ख्याती आहे.
लहानपणीचा किस्सा म्हणजे ८व्या इयत्तेत असल्यापासून ते आपल्या नावापुढं आयएएएस असं लिहीत, पुढे अभ्यास करून त्यांनी ते खरं करूनही दाखवलं.
राजेश मीना यांना या पदावर कमी कालावधीसाठी काम करण्याची संधी मिळणार आहे. केवळ ६१ दिवसच ते या पदावर काम करणार असून ऑगस्टमध्ये निवृत्त होणार आहेत.
येत्या दोन महिन्यात राज्यात स्थानिक स्वराज्य संस्थांच्या निवडणुकांची रणधुमाळी असणार आहे. त्यामुळं निवडणुकांच्या पार्श्वभूमीवर मीना काय महत्वाचे निर्णय घेतात हे पाहणं महत्वाचं ठरणार आहे.