Deepak Kulkarni
जेन झी मनात आले तर काय करु शकतात हे नव्यानं सांगायला नको, पण याचा पुन्हा एकदा जबरदस्त प्रत्यय पुन्हा एकदा मध्य प्रदेशात आला..
मध्य प्रदेशमधील बियावरा येथील 21 वर्षीय सुरेंद्र सिंग चौधरी व सोशल मीडियावर 'बिट्टू तबाही' नावानं फेमस असलेल्या विद्यार्थ्यानं प्रदूषित अजनार नदी स्वच्छ करण्याची मोहीम हाती घेत तिचा अगदी कायापालट केला आहे.
कोणतंही सुरक्षेची साधने सोबत नसताना, आरोग्याबाबतचे धोके, श्वापदं,जलचर प्राणी यांचा सामना करत 'बिट्टू तबाही ने मोठ्या धाडस आणि जिद्दीनं एकट्यानेच नदीतील बराचसा कचरा आणि गाळ काढला आहे.
ज्यावेळी बिट्टू तबाही एका प्रदूषित नदीत उतरला त्यावेळी त्याच्याजवळ ना हातमोजे होते ना बूट...त्याला पोहताही येत नव्हतं. तरीही, त्यानं एकट्यानं नदी स्वच्छ करण्याची मोहीम फत्ते केल्यानं त्याला जगभरात नवी ओळख मिळाली आहे.
विशेष म्हणजे त्यानं नदीत विसर्जित केलेल्या पूजा साहित्य, निर्माल्य यांच्यापासून खत निर्मितीची प्रक्रिया सुरू केली. या कार्यात मित्रांनाही सोबत घेत त्यानं 30000 रुपये गोळा करत स्वच्छतेची साधने व कचराकुंड्या खरेदी केल्या.
नदी स्वच्छतेची मोहीम पार पाडत असताना बिट्टूच्या हाताला एका क्षणी तर संसर्गही झाला, मात्र त्याने हार न मानता आपलं कार्य पुढं तसंच सुरू ठेवलं.
त्याचं हे काम पाहून बिट्टूचं उद्योजक आनंद महिंद्रा तसेच माजी क्रिकेटपटू केविन पीटरसन यांनीही कौतुक केलं. तसेच त्याला डच संस्था 'द ओशन क्लीनअप'ने नोकरीची संधी दिली आहे.
बिट्टूने अफाट मेहनतीनं अजनार नदी स्वच्छ केली आणि सोशल मीडियावर या स्वच्छता मोहिमेचे काही फोटो शेअर केले, जे प्रचंड प्रमाणात व्हायरलही झाले. मुख्यमंत्री मोहन यादव यांनीही त्याची शुक्रवारी भेट घेतली.
आता बिट्टूच्या या मोहिमेला व्यापक स्वरुप आले असून बियावरा नगरपालिकाही त्याच्यासोबत उभी राहिली आहे. नदीतील साचलेला कचरा काढण्यासाठी अवजड यंत्रसामग्री पुरवत ही नदी स्वच्छतेची मोहीम पूर्ण करण्यासाठी पूर्ण ताकद पणाला लावली आहे.