Jagdish Patil
बंगालच्या उपसागरात तयार झालेले 'अर्णब' चक्रीवादळ आज (ता.२८) दुपारनंतर आंध्र प्रदेशातील यानमजवळ किनाऱ्याला धडकण्याची शक्यता आहे.
या चक्रीवादळाचा तडाखा चेन्नईला बसला असून, समुद्राचे पाणी किनारी भागात शिरल्याने वाहतूक विस्कळीत झाली आहे.
आंध्र प्रदेशातील काकीनाडा येथे चक्रीवादळामुळे अनेक झाडे कोसळली, वीजवाहिन्यांचेही नुकसान झाले आहे.
अग्निशमन दलाकडून रस्त्यांवरील झाडे हटवण्याचे काम सुरू असून, बाधित भागांत बचावकार्य हाती घेण्यात आले आहे.
चक्रीवादळाचा २४ बाधित जिल्ह्यातील २.७० कोटी लोकसंख्येला फटका बसलाय. तर १.३५ लाख नागरिकांना सुरक्षित स्थळी हलवण्यात आले आहे.
चक्रीवादळामुळे १०० हून अधिक रेल्वे गाड्या रद्द तर चार विमानतळांवरील २१ विमानांची उड्डाणे रद्द करण्यात आली आहेत.
पुद्दुचेरी, आंध्र प्रदेश, ओडिशा, छत्तीसगड, तेलंगणा, ईशान्य महाराष्ट्र आणि कर्नाटकसह अनेक राज्यांना पावसाचा इशारा देण्यात आला आहे.
हवामान विभागाच्या अंदाजानुसार, पश्चिम गोदावरी आणि यानमच्या किनारपट्टीवर ताशी ११५ ते १२५ किमी वेगाने वारे वाहण्याची शक्यता आहे.
तसंच अनाकापल्ली, विशाखापट्टणम आणि विजयनगरम जिल्ह्यांतील काही भागांत पुढील सहा तासांत अचानक पूर येण्याचा धोका वर्तवला आहे.
विशाखापट्टणममध्ये २१७ मिमी, कलिंगपट्टणममध्ये १४७ मिमी, काकीनाडामध्ये ११८ मिमी, मछलीपट्टणममध्ये ११५ मिमी आणि पुरीमध्ये ७२ मिमी पाऊस झाला आहे.