Jagdish Patil
भोंदू खरात प्रकरणात नाव आल्याने रूपाली चाकणकर यांना महिला आयोगाच्या अध्यक्षपदाचा राजीनामा द्यावा लागला होता.
त्यानंतर त्यांच्यावर अनेक गंभीर आरोप करण्यात आले. हे आरोप करणाऱ्यांविरोधात त्यांनी कायदेशीर लढाई लढण्याचा निर्णय घेतला आहे.
त्यांनी खरातच्या आर्थिक व्यवहाराशी, माझा संबंध नव्हता. मी कोणत्याही महिलेला खराताकडे नेलेलं नाही, असं सांगितलं.
तसंच या प्रकरणात माझा आक्षेपार्ह फोटो व्हिडिओ नसताना माझ्यावर अतिशय अश्लील भाषेत टीका झाल्याचंही म्हटलं.
पुरावा नसताना माझ्यावर केलेले आरोप वेदनादायी होते म्हणून माझी लढाई कायद्याच्या चौकटीतून लढणार असल्याचं त्यांनी सांगितलं.
यावेळी त्यांनी आशा मिरगे या बाईने डिबेट शोमध्ये अतिशय असभ्य भाषेत विधाने केल्याचा उल्लेख केला.
मिरगे यांना ४ एप्रिलला पाठवलेली नोटीस त्यांनी स्वीकारली नाही, म्हणून त्यांना एकूण तीन नोटीस पाठवल्याचंही त्यांनी सांगितंलं.
तर चाकणकर यांनी थेट आपल्यावर असभ्य भाषेत टीका केल्याचा आरोप केलेल्या आशा मिरगे कोण आहेत ते जाणून घेऊया.
व्यवसायाने स्त्रीरोगतज्ज्ञ असलेल्या डॉ. आशा मिरगे या महाराष्ट्रातील एक वरिष्ठ राजकारणी आणि राष्ट्रवादी काँग्रेस पक्षाच्या नेत्या आहेत.
काँग्रेस-राष्ट्रवादी आघाडी सरकारच्या काळात त्या महाराष्ट्र राज्य महिला आयोगाच्या सदस्य होत्या.