Deepak Kulkarni
कर्नाटकचे मुख्यमंत्री सिद्धारमय्या यांचा मुलगा, यतींद्र सिद्धारमय्या यांनी केलेल्या एका वक्तव्यामुळे राजकीय भूकंप होण्याची शक्यता वर्तवली जात आहे.
यतींद्र यांनी आपले वडील सिद्धारमय्या हे त्यांच्या राजकीय जीवनाच्या अंतिम टप्प्यात असून कर्नाटकला आता प्रगतिशील विचारांच्या मुख्यमंत्र्यांची गरज असल्याचं विधानही त्यांनी केलं. सतीश जारकीहोळी हे मुख्यमंत्रिपदासाठी योग्य व्यक्ती असल्याचंही ते म्हणाले.
कर्नाटकात पुन्हा एकदा मुख्यमंत्री बदलाची चर्चा जोर धरू लागली आहे. यात जारकीहोळी यांचं नाव आघाडीवर असल्याचं दिसून येत आहे.
जारकीहोळी सध्या सिध्दारमय्या यांच्या मंत्रिमंडळात सार्वजनिक बांधकाम खात्याचे मंत्री आहेत. तसेच ते बेळगावचे पालकमंत्रीपदाची जबाबदारी सांभाळत आहेत.
जारकीहोळी यांची बेळगावच्या राजकारणात 'सावकार' म्हणून ओळख आहे.
बेळगावच्या राजकारणातलं मोठं प्रस्थ असलेल्या जारकीहोळी यांचे सख्खे चार भाऊ वेगवेगळ्या पक्षातून आमदार आहेत.
सतीश जारकीहोळी यांचा एक भाऊ विधान परिषदेवर तर तीन विधानसभेत आमदार आहेत, त्यांची 28 वर्षांची कन्या प्रियंका खासदार आहेत. त्या चिक्कोडी लोकसभा मतदारसंघातून निवडून गेल्या आहेत.
मुख्यमंत्री सिद्धारमय्या यांचे अत्यंत विश्वासू सहकारी म्हणून सतीश जारकीहोळी हे ओळखले जातात.
काँग्रेसचे नेते डी के शिवकुमार यांच्याशी जारकीहोळी यांचे तितकेसे राजकीय सूर जुळले नसल्याचे नेहमीच दिसून आलं आहे.