Aslam Shanedivan
मूळचे बिहारमधील सिवान जिल्ह्यातील असलेले मोहिबुल्लाह अंसारी हे दहावी-बारावीच्या सराव परीक्षांमध्ये नापास झाले होते.
पण अभ्यासात सातत्य ठेवत त्यांनी २०११ मध्ये भारतीय तंत्रज्ञान संस्था (आयआयटी) दिल्ली येथे रसायन अभियांत्रिकी शाखेत प्रवेश मिळविला.
पुढे त्यांनी २०१५ मध्ये यूपीएससी परीक्षेची तयारी सुरू केली. दोन प्रयत्नांतील अपयशानंतर तिसऱ्या प्रयत्नात त्यांनी ३८१वा क्रमांक मिळवत ते IPS अधिकारी झाले.
त्यांच्या याच जिद्द, मेहनत आणि प्रेरणादायी प्रवासाची दखल आता साता समुद्रापार अमेरिकेत घेतली गेली आहे.
फ्लोरिडातील टाम्पा येथे १३ डिसेंबरला त्यांना ‘द एशियन हिरो अवॉर्ड’ने सन्मानित करण्यात येणार आहे.
असोसिएशन ऑफ वर्ल्ड्स फेअर्स अँड फेस्ट्स यूएसए इंक या संस्थेतर्फे त्यांना हा पुरस्कार दिला जाणार आहे.
अंसारी सध्या मुजफ्फरपूरचे सिटी एसपी असून लोकसेवा, नेतृत्व आणि समाजकल्याणातील योगदानासाठी त्यांची निवड करण्यात आली आहे.
नापास विद्यार्थी ते आयपीएस अधिकारी आणि आता आंतरराष्ट्रीय पुरस्कारापर्यंत मारलेली मजल हा प्रवास अनेकांसाठी प्रेरणादायी ठरत आहे.