Amit Ujagare
मायावतींच्या बहुजन समाज पार्टीचे अर्थात बसपाचे एकमेव आमदार असलेल्या उमाशंकर सिंह ठाकूर यांचं दुर्मिळ अशा मेंदूच्या कर्करोगानं निधन झालं. गेल्या दोन वर्षांपासून ते या आजाराशी झुंज देत होते.
उमाशंकर सिंह हे उत्तर प्रदेशातील बलिया जिल्ह्यातील रसडा विधानसभा मतदारसंघातून आमदार होते. सलग तीन वेळेला त्यांनी या मतदारसंघातून आमदारकी भुषवली आहे.
उमाशंकर सिंह यांची सर्वात मोठी गोष्ट म्हणजे सध्याच्या पक्षनिष्ठा विकून खाण्याच्या जमान्यात ते बहुजन समाज पार्टीसोबत शेवटच्या श्वासापर्यंत एकनिष्ठ राहिले. त्यामुळं त्यांची मृत्यूनंतरही सर्वाधिक चर्चा होत आहे.
बसपाच्या सर्वोसर्वा मायावती यांचे उमाशंकर सिंह हे अत्यंत विश्वासू आणि जवळचे सहकारी होते. मायावतींना ते मोठी बहीण मानायचे त्यामुळं मायावती हे देखील त्यांना राखी बांधायच्या. त्यामुळं उमाशंकर सिंह यांच्या निधानानंतर मायावती यांना अश्रू अनावर झाले होते.
उमाशंकर सिंह यांच्या कुटुंबियांची भेट घेऊन त्यांचं सांत्वन केल्यानंतर मायावती यांनी उमाशंकर यांच्या मुलाला विश्वास दिला की, कुठलीही अडचण आली तरी डगमगायचं नाही आम्ही तुमच्या पाठीशी आहोत.
उत्तर प्रदेशचा पूर्व भाग हा पूर्वांचल म्हणून ओळखला जातो या भागातील येणारे उमाशंकर सिंह हे मातब्बर नेते म्हणून ओळखले जातात. बसपाचे तर रॉबिन हूड अशी त्यांची ओळख आहे.
उमाशंकर सिंह यांचे वडील घुरहू सिंग हे भारतीय सैन्यात होते, माजी सैनिक म्हणून ते निवृत्त झाले होते. वडील जरी सरकारी नोकरीत असले तरी कुटंब हे शेतकरी असल्यानं उमाशंकर सिंह सरकारी शाळेत शिकले.
त्यानंतर बलिया इथल्या सतीशचंद कॉलेजमधून त्यांनी महाविद्यालयीन शिक्षण पूर्ण केलं. तसंच कॉलेजमध्ये ते विद्यार्थी नेते होते, १९९१ मध्ये विद्यार्थी संघटनेची निवडणूक लढवली होती, तसंच आजपर्यंतच्या सर्वाधिक मताधिक्यानं ते जिंकले होते.
फेब्रुवारी २०१६ मध्ये त्यांनी हिंदू-मुस्लीम सामुहिक विवाह सोहळा आयोजित केला होता. यामध्ये त्यांनी जवळपास ३५० विवाह लावून दिले होते. हिंदू-मुस्लिमांमधील दरी करण्यासाठी त्यांनी हा कार्यक्रम घेतला होता.