Rashmi Mane
8व्या वेतन आयोगाबाबत महत्त्वाची हालचाल सुरू झाली आहे. आयोगाने पुन्हा बैठकींचे नियोजन सुरू केले असून विविध राज्यांतील कर्मचारी संघटना, निवृत्तीवेतनधारक आणि संबंधित प्रतिनिधींशी चर्चा होणार आहे.
सर्व प्रक्रिया नियोजनानुसार पार पडल्यास 8वा वेतन आयोग आपल्या शिफारसी 2027 च्या पहिल्या सहामाहीत केंद्र सरकारकडे सादर करू शकतो. त्यानंतर सरकार निर्णय घेऊन नवीन वेतन संरचनेची अंमलबजावणी करण्याचा मार्ग मोकळा होईल.
आयोगाने सप्टेंबर 2026 मध्ये विविध ठिकाणी बैठका आयोजित करण्याचा निर्णय घेतला आहे. या बैठकींमध्ये कर्मचारी संघटना, विविध संस्था आणि इतर संबंधित घटकांकडून सूचना व मागण्या जाणून घेतल्या जाणार आहेत.
8वा वेतन आयोग 16 ते 18 सप्टेंबर 2026 दरम्यान चंदीगड येथे तीन दिवस राहणार आहे. पंजाब, हरियाणा, हिमाचल प्रदेश आणि केंद्रशासित प्रदेश चंदीगडमधील संबंधित प्रतिनिधींशी सविस्तर चर्चा होणार आहे.
केंद्र सरकारच्या संस्था, कर्मचारी संघटना, फेडरेशन, युनियन, निवृत्तीवेतनधारक आणि इतर संबंधित पक्ष आयोगासोबत चर्चेसाठी अर्ज करू शकतात. चंदीगड बैठकीसाठी अर्ज करण्याची अंतिम तारीख 25 ऑगस्ट 2026 आहे.
7 ते 10 ऑगस्ट 2026 रोजी दिल्ली, 7 ते 8 सप्टेंबर रोजी चेन्नई आणि 9 सप्टेंबर रोजी पुडुचेरी येथे बैठका होणार आहेत. संबंधित संघटनांना निश्चित मुदतीपूर्वी भेटीसाठी विनंती सादर करावी लागणार आहे.
या बैठकींमध्ये वेतन, भत्ते, सेवा अटी आणि निवृत्तीवेतनाशी संबंधित मागण्यांवर चर्चा केली जाणार आहे. आयोग सर्व संबंधितांचे मत जाणून घेतल्यानंतर अंतिम शिफारसी तयार करणार आहे.
8व्या वेतन आयोगाच्या बैठका वेतनवाढीच्या प्रक्रियेतील महत्त्वाचा टप्पा मानल्या जात आहेत. आता सर्वांचे लक्ष आयोगाच्या अंतिम शिफारसी आणि त्यानंतर केंद्र सरकारच्या निर्णयाकडे लागले आहे.