Deepak Kulkarni
दिल्लीतील जंतर मंतरवरील विद्यार्थ्यांच्या यशस्वी आंदोलनानंतर 'कॉक्रोच जनता पार्टी'ने देशभरात 'स्कूल ठीक करो' या नवीन अभियानाची घोषणा केली आहे.
सीजेपीच्या अभिजीत दीपके यांनी या मोहिमेची सुरुवात केली असून याद्वारे राज्यातील ग्रामीण आणि सरकारी शाळांच्या दुरावस्थेविरोधात उठवलेला आवाज सरकारपर्यंत पोहोचवला जाणार आहे.
देशाच्या 80 व्या स्वातंत्र्य दिनी सीजेपीच्या अभिजीत दीपकेंनी हिंगोली जिल्ह्यातील त्यांच्या मूळ संतुक पिंपरी गावातून स्कूल ठीक करो या शैक्षणिक उपक्रमाला सुरुवात केली.
अभिजित दिपके यांच्याहस्तेच संतूक पिंपरी या त्यांच्या मूळ गावी जिल्हा परिषद शाळेत ध्वजारोहण करण्यात आले.
अभिजीत दीपके यांनी शाळेतील विद्यार्थ्यांशी मनमोकळा संवाद साधताना एक उत्तम आदर्शही त्यांच्यासमोर ठेवला. त्यांनी खुर्चीवर बसणं नाकारत जमिनीवर बसणं पसंद केलं.
त्यांनी यावेळी विद्यार्थ्यांसह त्यांच्या पालकांसोबत शिक्षणाचा दर्जा, शाळेतील मूलभूत सुविधा,पाल्यांची सुरक्षितता यांसारख्या विविध विषयांवर चर्चा केली. यावेळी त्यांनी पालकांच्याही समस्या ऐकून घेतल्या.
दिपके यांच्यासह त्यांच्या 'सीजेपी' चळवळीचा या अभियानामागचा उद्देश हा राज्यातील ग्रामीण भागातील शाळांची झालेली दुरावस्था आणि शिक्षणाची वाताहत लोकांसह सरकारसमोर आणण्याचा हा आहे.
विद्यार्थ्यांना शिकवणे हेच शिक्षकांसाठी एकच काम असायला हवं.एसआयआर किंवा इतर सरकारी कामांसाठी दुसरे लोक नियुक्त करा असं सांगतानाच या कामांसाठी अनेक बेरोजगार तरुण असल्याची आठवणही करुन दिली.
तसेच या अभियानाच्या सुरुवातीलाच दिपके यांनी शाळेला भेट दिल्यावर त्यांना शाळेच्या इमारती आणि सोयीसुविधांची गंभीर स्थिती निदर्शनास आली. तसेच तुटलेल्या खिडक्या, अत्यंत अस्वच्छ स्वच्छतागृह असं भयानक वास्तवही समोर आलं.