Rajanand More
कर्नाटकातील इंडी विधानसभा मतदारसंघाचे काँग्रेसचे आमदार यशवंतरायगौड पाटील यांनी आपल्या पदाचा राजीनामा दिला आहे. मुख्यमंत्र्यांसह विधानसभा अध्यक्षांकडे त्यांनी राजीनामा धाडला आहे.
दुष्काळग्रस्त तालुक्यांच्या यादीत मतदारसंघाचा समावेश करावा, अशी त्यांची मागणी आहे. सरकार दुर्लक्ष करत असल्याचे कारण देत त्यांनी थेट राजीनाम्याचे पाऊल उचलल्याने ते चर्चेत आले आहेत.
आमदार पाटील यांचा मागील दोन महिन्यांतील हा दुसरा राजीनामा आहे. पक्षातील नेत्यांनी समजूत काढल्यानंतर त्यांनी मागील राजीनामा मागे घेतला होता.
कर्नाटकात ऑगस्ट महिन्यात झालेल्या मंत्रिमंडळ विस्तारात पाटील यांना स्थान दिले नाही. त्यामुळे पक्षावर जाहीरपणे नाराजी व्यक्त करत त्यांनी आमदारकीचा राजीनामा दिला होता.
पाटील हे इंडी मतदारसंघाचे २०१३ पासून आमदार आहेत. त्यामुळे मंत्रिपद मिळण्यासाठी ते सातत्याने आक्रमक भूमिका मांडत आले आहेत.
आमदार पाटील हे पक्षातील ज्येष्ठ नेते असून माजी मुख्यमंत्री सिध्दरामय्या यांच्या गटातील मानले जातात. त्यांनी अनेकदा पक्षातील नेत्यांवर उघडपणे नाराजी व्यक्त केली आहे.
पाटील यांनी राजीनामा देताना केवळ ताकदवान आणि दबावतंत्राचा वापर करणाऱ्या लोकांचीच कामे होत असल्याचे सांगत नाराजी व्यक्त केली आहे. माझ्यासारख्या नेत्यांना इथे स्थान नसल्याचेही ते म्हणाले.
आमदार पाटील हे भावनिक असल्याचे मुख्यमंत्री डी. के. शिवकुमार यांनी म्हटले आहे. कोणत्याही मतदारसंघाबाबत भेदभाव केला जात नाही. दुष्काळ जाहीर करण्यासाठी काही निकष असल्याचेही ते म्हणाले.