Deepak Kulkarni
छत्तीसगडच्या नक्षलग्रस्त भाग म्हणून ओळखला जाणाऱ्या दंतेवाडा येथे डॅशिंग पोलिस अधिकारी म्हणून कार्यरत राहिलेल्या डीएसपी कल्पना वर्मा मोठ्या वादात सापडल्या आहेत.
डीएसपी कल्पना वर्मांवर गंभीर आरोप करण्यात आले असून त्यांचे काही फोटोही सोशल मीडियावर चांगलेच व्हायरल झाले आहे.
रायपूरचे व्यावसायिक दीपक टंडन यांनी डीएसपी कल्पना वर्मा यांच्यावर 2 कोटी रुपये, 12 लाख रुपयांची हिऱ्याची अंगठी, 5 लाख रुपयांची सोन्याची चेन आणि टॉप्स, एक इनोव्हा क्रिस्टा कार आणि 1 लाख रुपयांचx ब्रेसलेट घेतल्याचा आरोप केल्यामुळे पोलिस प्रशासनात खळबळ उडाली आहे.
याप्रकरणी दीपक टंडन यांनी पोलिस ठाण्यात तक्रारही दाखल केली होती. यावेळी त्यांनी असंख्य पुरावेही पोलिसांकडे दिले होते. आता याप्रकरणी मोठी अपडेट समोर आली आहे.
आता छत्तीसगड सरकारने दंतेवाडा जिल्ह्यात तैनात असलेल्या डीएसपी कल्पना वर्मा यांचं तडकाफडकी निलंबन केलं आहे.
सरकारनं कल्पना वर्मा यांच्यावर व्यावसायिकाची प्रेमप्रकरणात आर्थिक फसवणूक आणि पदाचा गैरवापर करून गोपनीय माहिती लिक केल्याचा गंभीर ठपका ठेवला आहे.
याप्रकरणी गृह विभागाकडून करण्यात आलेल्या प्राथमिक चौकशीत कल्पना वर्मा या दोषी आढळल्याचं समोर आल्यानंतर निलंबनाचे आदेश जारी केले आहेत. चौकशीत नोंदवलेले जबाब, व्हॉट्स अप चॅट, आर्थिक व्यवहारांमध्ये तफावत दिसून आली आहे.
छत्तीसगड सरकारच्या गृहविभागानं या प्रकरणाची अप्पर पोलीस अधीक्षक दर्जाच्या अधिकाऱ्याकडून चौकशी केल्याचं म्हटलं आहे. तसेच चौकशीसंबंधीचा तब्बल 1475 पानांचा सविस्तर अहवाल सादर करण्यात आल्याचंही समोर आलं आहे.
कल्पना वर्मा यांच्या संबंधी काही गंभीर बाबी सादर करण्यात आलेल्या अहवालातून समोर आल्या आहेत. व्यावसायिक दीपक टंडन यांनी त्यांच्या पोलिस तक्रारीत 2021 पासून वर्मा यांनी त्यांना 'लव्ह ट्रॅप'मध्ये अडकवून 2.5 कोटी रुपये उकळल्याचा आरोप केला आहे.