Rajanand More
तमिळनाडूतील सुपरस्टार थलापती विजय यांनी टीव्हीके पक्षाची स्थापना करत विधानसभा निवडणूक लढविली अन् पहिल्याच निवडणुकीत सत्ताही काबीज केली. सध्या ते राज्याचे मुख्यमंत्री आहेत.
तमिळनाडूतील प्रसिध्द अभिनेते धनुष यांनीही विजय यांच्या पावलावर पाऊल टाकले असून लवकरच त्यांचीही राजकारणात एन्ट्री होणार असल्याची जोरदार चर्चा आहे.
तमिळनाडूतील धनुष यांच्या फॅन्सने 'धनुष नरपणी इयक्कम' ही सामाजिक संघटना सुरू केली आहे. कोईम्बतूर येथे झालेल्या बैठकीला सुमारे ३ हजारांहून अधिक चाहते व संघटनेचे पदाधिकारी उपस्थित होते.
बैठकीत सामाजिक कामावर भर, संघटनात्मक शिस्त आदी मुद्यांवर चर्चा झाली. संघटनेच्या माध्यमातून धनुष यांचे सामाजिक कामही लोकांपर्यंत पोहोचविण्याचा हा प्रयत्न आहे.
धनुष यांची या बैठकीला गैरहजेरी असली तरी चाहत्यांनी उचललेल्या या पावलामुळे त्यांच्या राजकीय एन्ट्रीबाबत तर्कवितर्क लढविले जाऊ लागले आहे. कारण विजय यांची सुरूवातही अशीच झाली होती. धनुष किंवा चाहत्यांनी राजकारणाबाबत अधिकृत घोषणा केलेली नाही.
टीव्हीकेने धनुष यांच्या राजकीय एन्ट्रीच्या चर्चेचे स्वागत केले आहे. मुख्यमंत्री विजय यांचा सिनेमापासून मुख्यमंत्रिपदापर्यंतचा प्रवास नव्या राजकीय पक्षांसाठी प्रेरणादायी ठरल्याचे पक्षाने म्हटले आहे.
धनुष हा दक्षिणेतील लोकप्रिय अभिनेता असून अनेक हिट चित्रपट दिले आहे. त्यांना दोनदा राष्ट्रीय पुरस्कारही मिळाला आहे. त्यासोबत फिल्मफेअरसह अनेक पुरस्कारांचे ते मानकरी आहेत.
मीडिया रिपोर्ट्सनुसार, धनुष यांची एकूण संपत्ती सुमारे २३० कोटी रुपये आहे आहे. एका चित्रपटासाठी ते २० ते २५ कोटी रुपये मानधन घेतात.