सरकारनामा ब्यूरो
आपल्याला पोलिसांची मदत हवी असेल तर आपण 100 नंबर डायल करतो. आता त्याच्या जोडीला आणखी एक 112 या एका हेल्पलाइनवरून सर्व प्रकारची मदत मिळणार आहे. हा नंबर डायल करताच पोलिसांना नेमका फोन कोठून आला, हे समजणार आहे.
पोलीस अवघ्या 5 ते 7 मिनिटांमध्ये तेथे पोहचणार आहेत. सध्या पोलीस नियंत्रण कक्षाला फोन आल्यानंतर पोलिसांची सरासरी वेळ 7 मिनिटांमध्ये घटनास्थळी मदत पोहोचते.
पोलिसांना मोठ्या प्रमाणात वाहन उपलब्ध करून देण्यात आल्याने हा वेळ आणखी कमी होण्याची शक्यता आहे. गेल्या काही वर्षांमध्ये पोलीस दल हायटेक करण्याचा प्रयत्न करण्यात येत आहे. त्याचा डायल 112 हा एक भाग आहे.
कॉल प्रथम नवी मुंबई नियंत्रण कक्षात केंद्रात जातो. त्यानंतर संबंधित जिल्हा व जवळच्या पोलीस मार्शलकडे माहिती पोहोचते. मग तात्काळ पुढील कार्यवाही केली जाते.
कॉल नंतर पुढे GPS व जिओ-टॅगिंगद्वारे जवळचे पोलीस वाहन शोधले जाते आणि त्वरित घटनास्थळी पाठवले जाते. त्यामुळे नागरीकांना तात्काळ मदत मिळते.
यापूर्वी पोलिसांना तक्रारदाराने 100 नंबर वर कॉल केला असता लोकेशन कळत नसे. आता डायल 112 प्रणालीवर कॉल केल्यास लगेच लोकेशन समजते. त्यामुळे तक्रारदार यांना तत्काळ मदत मिळत आहे.
कॉल येताच पोलीस नियंत्रण कक्ष, अग्निशमन दल, महिला हेल्पलाइन, चाइल्ड हेल्पलाइन यांनाही या कॉलची माहिती दिली जाणार आहे. जेणेकरून घटनेचे गांभीर्य लक्षात घेऊन आवश्यकतेनुसार सर्व यंत्रणा घटनास्थळी दाखल होऊ शकतील.