Chaitanya Machale
राधेश्याम मोपलवार यांनी मुख्यमंत्री वॉर रूमच्या महासंचालकपदाचा राजीनामा दिला आहे. वैयक्तिक कारणासाठी हा राजीनामा दिला असल्याचे सांगितले जात आहे.
'एमएसआरडीसी'च्या व्यवस्थापकीय संचालकपदावरून मोपलवार यांना काही दिवसांपूर्वीच दूर करण्यात आले होते.
राज्यातील मेट्रो, सागरी सेतू, उड्डाणपूल, रस्ते आदी पायाभूत सुविधांच्या प्रकल्पांना गती देण्यासाठी एकनाथ शिंदे यांनी वॉर रूमची स्थापना केली होती.
राधेश्याम मोपलवार हे फेब्रुवारी 2018 मध्ये वयोमानानुसार सेवानिवृत्त झाले. मात्र, सेवानिवृत्तीनंतरही त्यांना मुदतवाढ देण्यात आली होती.
'एमएसआरडीसी'मध्ये असतानाच मोपलवार यांची वर्णी मुख्यमंत्री वॉर रूमवर लागली होती.
उपमुख्यमंत्री देवेंद्र फडणवीस यांचा ड्रीम प्रोजेक्ट असलेल्या नागपूर-मुंबई समृद्धी महामार्गाला गती दिली. या प्रकल्पाचा नागपूर ते शिर्डी हा पहिला टप्पा गेल्या वर्षी डिसेंबरमध्ये खुला झाला.
मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्याशी मोपलवार यांचे चांगले संबंध राहिलेले आहेत.
वॉर रूमच्या महासंचालकपदाचा मोपलवार यांनी दिलेला राजीनामा मुख्यमंत्री एकनाथ शिंदे यांनी स्वीकारला असल्याचे समजते.
आगामी काळात होणाऱ्या निवडणुकीसाठी परभणी, हिंगोली लोकसभा मतदारसंघातून मोपलवार हे रिंगणात उतरणार असल्याची जोरदार चर्चा आहे.