Deepak Kulkarni
आपल्या धडाकेबाज कार्यशैलीसाठी ओळखले जाणारे IAS अधिकारी तुकाराम मुंढे हे पुन्हा एकदा चर्चेत आले आहेत.
तुकाराम मुंढेंच्या 20 वर्षांच्या प्रशासकीय सेवेत 24 वेळा बदल्या झाल्या आहेत. याच कारणास्तव त्यांच्या प्रशासकीय कार्यपध्दतीवर नेहमीच शंका उपस्थित केली जात आली आहे.
त्यांच्या शिस्तबद्ध कार्यपद्धतीमुळे प्रशासनातील अधिकारी, कर्मचाऱ्यांसह राजकीय नेतेही अडचणीत आले आहेत.
बदल्यांचा फटका सहन करत आलेले तुकाराम मुंढे आता नागपूर येथे सुरु असलेल्या विधिमंडळाच्या हिवाळी अधिवेशनादरम्यान पुन्हा एकदा चर्चेत आले आहेत.
तुकाराम मुंढे हे महाविकास आघाडी सरकारच्या काळात नागपूर महानगरपालिकेत आयुक्त असताना स्मार्ट सिटी प्रकल्पात नियमबाह्य काम , महिला अधिकाऱ्यांना दमदाटी आणि 17 कर्मचाऱ्यांचं विनाकारण निलंबन केल्याचा आरोप त्यांच्यावर करण्यात आला आहे.
हे आरोप करत भाजप आमदार कृष्णा खोपडे यांनी नागपूर हिवाळी अधिवेशनात तुकाराम मुंढेंच्या निलंबनाची मागणी केली आहे.
त्यावेळी सीईओचे अधिकार नसतानाही मुंढेंनी 20 कोटी रुपये जारी केल्याचा ठपका ठेवत खोपडे यांनी हे प्रकरण गंभीर असल्याचं म्हणत थेट कारवाईचीच मागणी केली आहे.
हिवाळी अधिवेशनात नागपूरचे आमदार तुकाराम मुंढेप्रकरणी आक्रमक झाले असून वेलमध्ये आले. यानंतर प्रचंड गदारोळ झाल्यानं सभागृहाचं कामकाजही दहा मिनिटांसाठी स्थगित करण्यात आलं.
हिवाळी अधिवेशनात डॅशिंग अधिकारी तुकाराम मुंढेंच्या निलंबनाची मागणी करण्यात आल्यामुळे त्यांच्या नोकरीवरही टांगती तलवार निर्माण झाली आहे.