Aslam Shanedivan
मध्य प्रदेशातील सागर जिल्ह्यातील बांदा येथे विषारी दारू प्यायल्याने १६ जणांचा मृत्यू झाल्याने पोलिसांच्या कार्यपद्धतीवर प्रश्न उपस्थित झाले होते.
या प्रकरणामुळे राज्यात खळबळ उडाल्यानंतर पोलीस अधीक्षक आयपीएस अनुराग सुजानिया यांना पदावरून हटवण्यात आले होते.
तर त्यांची नियुक्ती पोलीस मुख्यालयात एआयजी म्हणून करण्यात आली होती. मात्र चारच दिवसांनंतर त्यांनी भारतीय पोलीस सेवेचा राजीनामा दिला आहे.
आयपीएस अधिकारी अनुराग सुजानिया यांनी वैयक्तिक कारणांमुळे आपण राजीनामा देत असल्याचे म्हटले आहे.
पण वरिष्ठ पदावरून हटवल्यानंतर त्यांनी हा निर्णय घेतल्याची चर्चा असून आता पोलीस वर्तुळात खळबळ उडाली आहे.
अनुराग सुजानिया हे २०१४ च्या बॅचचे आयपीएस अधिकारी असून ते मध्य प्रदेश कॅडरमध्ये कार्यरत आहेत. ते मूळचे राजस्थानचे असून एमटेकपर्यंत शिक्षण घेतले आहे.
अनुराग सुजानिया यांनी टीकमगढ, मंदसौर आणि मुरैना यांसारख्या जिल्ह्यांमध्ये पोलीस अधीक्षक म्हणून काम केल्यानंतर त्यांची सागर जिल्ह्याच्या पोलीस अधीक्षकपदी नियुक्ती झाली होती.