Rajanand More
आयपीएस अधिकारी कुंदन कृष्णन हे बिहारचे अतिरिक्त पोलीस महासंचालक (कायदा व सुव्यवस्था) म्हणून कार्यरत आहेत. ते १९९४ च्या तुकडीचे वरिष्ठ अधिकारी असून पोलीस दलात दबदबा आहे.
आयपीएस कृष्णन यांनी राष्ट्रीय जनता दलाचे खासदार सुधाकर सिंह यांना मानहानीची कायदेशीर नोटीस पाठवली आहे. १५ दिवसांत माफी न मागितल्यास ५ कोटीची नुकसान भरपाई आणि फौजदारी मानहानीचा खटला दाखल करू, असे नोटिशीमध्ये म्हटले आहे.
हे प्रकरण भरत भूषण तिवारी या तरुणाचा एन्काऊंटर आणि आणि जमुई येथील मुलीच्या विनयभंगाच्या घटनेसंदर्भात खासदारांनी केलेल्या वक्तव्यांशी संबंधित आहे.
सुधारकर सिंह यांनी तिवारीचा मृत्यू आणि जमुईतील घटनेच्या अनुषंगाने कुंदन कृष्णन यांच्या भूमिकेवर प्रश्नचिन्ह उपस्थित केले होते. सिंह यांनी काही गंभीर आरोप केले होते.
कुंदन कृष्णन यांनी सर्व आरोप निराधार असल्याचे म्हटले आहे. बिहार सरकारने या प्रकरणाच्या चौकशीसाठी २० जून २०२६ रोजी निवृत्त न्यायमूर्ती विनोद कुमार सिन्हा यांच्या अध्यक्षतेखाली एक चौकशी आयोग स्थापन केला आहे.
कायदेशीर नोटिशीला कायद्यानेच उत्तर दिले जाईल, असे सिंह यांनी म्हटले आहे. आपण माफी मागणार नाही, असेही त्यांनी स्पष्ट केले आहे. त्यामुळे हे प्रकरणात कोर्टात जाणार असल्याचे स्पष्ट झाले आहे.
तिवारीचा मृत्यू झाला त्यावेळी कुंदन कृष्णन हे एसटीएफचे महासंचालक होते. त्यामुळे, पोलीस कमांड, पोलीस मुख्यालय आणि वरिष्ठ निर्णय घेणाऱ्या अधिकाऱ्यांच्या भूमिकेचीही चौकशी झाली पाहिजे, अशी मागणी सिंह यांनी केली आहे.
आयपीएस कुंदन कृष्णन यांना राष्ट्रपतींचे विशिष्ट सेवेसाठीचे पोलीस पदक, शौर्य पदक मिळाले आहे. तसेच केंद्रीय निवडणूक आयोगानेही त्यांना राष्ट्रीय मतदार दिन विशेष पुरस्कार देऊन सन्मानित केले आहे.