Ganesh Sonawane
विधान परिषद निवडणुकीच्या आचारसंहितेमधून नाशिकमधील सिंहस्थ कुंभमेळ्यासह इतर तातडीच्या कामांना वगळण्यात आले आहे.
निवडणूक आयोगाच्या संमतीने राज्य सरकारच्या नगरविकास विभागाने आदेश काढले. त्यामुळे सिंहस्थ कामांचा मार्ग मोकळा झाला आहे.
सिंहस्थ तयारीत विघ्न येऊ नये म्हणून जिल्हाधिकारी आयुष प्रसाद यांनी राज्य शासनाला पत्र देत कुंभमेळा व इतर तातडीच्या कामांना आचारसंहितेतून वगळण्याची विनंती केली होती.
त्यानुसार राज्य सरकारने हा प्रस्ताव भारत निवडणूक आयोगाकडे पाठविला होता.
२२ मेस निवडणूक आयोगाने या प्रस्तावाला हिरवा कंदील दिला.
त्यानुसार, कुंभमेळ्याशी संबंधित चालू आणि प्रस्तावित कामांना आचारसंहितेच्या निर्बंधातून सवलत दिली आहे.
नाशिक शहर व तालुक्यातील जनहिताच्या कामांनाही आचारसंहितेतून वगळण्यात आले आहे. कुंभमेळा प्राधिकरणांतर्गत सर्व विकासकामे कोणतीही अडचण न येता सुरू राहतील.
त्यामुळे सिंहस्थाच्या अनुषंगाने सुरू असलेली रस्ते रुंदीकरण, घाट सुधारणा, पाणीपुरवठा योजना तसेच भाविकांच्या सोयी-सुविधांशी संबंधित विकासकामांना गती मिळेल.