Ganesh Sonawane
ऊस शेतीमुळे वाढलेल्या बिबट्यांच्या हालचालीवर नियंत्रण ठेवण्यासाठी जुन्नर वन विभागाने एआय तंत्रज्ञानाचा वापर सुरू केला आहे.
जुन्नर, खेड, आंबेगाव आणि शिरूर तालुक्यातील बिबट्या प्रवण क्षेत्रातील ५५ हॉटस्पॉटवर कृत्रिम बुद्धिमत्तेवर आधारित (AI) सीसीटीव्ही कॅमेरे बसवले आहेत.
कॅमेऱ्याच्या नियंत्रण क्षेत्रात बिबट्या येताच ध्वनिक्षेपकावरून सायरन वाजतो आणि शेतकऱ्यांना तत्काळ अलर्ट मिळतो.
एआय प्रणालीमध्ये मोशन सेन्सर असल्याने बिबट्याचे फोटो लगेच टिपले जातात आणि ध्वनी अलर्ट सुरु होतो. यासाठी विशेष खांब उभारण्यात आले असून, त्यावरच सायरन लावण्यात आला आहे.
या तंत्रज्ञानामुळे शेतकरी वेळेत सावध होतात, त्यामुळे हल्ल्यांच्या घटना कमी होण्यास मदत होत आहे.
उपवनसंरक्षक प्रशांत खाडे यांनी सांगितले की हा प्रयोग तातडीचा आणि दीर्घकालीन उपाय म्हणून यशस्वी ठरत आहे.
शिरूर तालुक्यातील पिंपळाचा मळा, फराटेवाडी, मांडवगण फराटा, शिवनगर आणि पिंपळसुटी या भागांवर विशेष लक्ष देण्यात आले आहे.
पुढील टप्प्यात ऊस प्रवण इतर गावांमध्येही एआय कॅमेरे आणि सायरन बसवले जाणार आहेत, अशी माहिती वन विभागाने दिली.