Akshay Sabale
शिवसेना ( ठाकरे गट ) पक्षातून माजी मंत्री रवींद्र वायकर यांनी एकनाथ शिंदे यांच्या शिवसेनेत प्रवेश केला होता. त्यानंतर त्यांना उत्तर-पश्चिम मुंबईतून तिकीट जाहीर केलं आहे.
उत्तम-पश्चिम मुंबईमध्ये रवींद्र वायकर विरुद्ध ठाकरे गटाचे अमोल कीर्तिकर, अशी लढत होणार आहे. गेल्या पाच वर्षांत रवींद्र वायकर यांच्या संपत्तीत किंचित वाढ झाल्याचे दिसत आहे.
घोटाळ्यांचे आरोप, ईडी चौकशी या कारणांमुळे चर्चेत असलेल्या वायकरांच्या संपत्ती विवरणाकडे राजकीय वर्तुळाचं लक्ष लागून राहिलं होतं.
2019 मध्ये रवींद्र वायकर यांच्याकडे 10 कोटी 19 लाख 36 हजार 110 रुपये इतकी जंगम मालमत्ता होती.
2024 मध्ये जंगम मालमत्तेत वाढ होऊन ती 12 कोटी 20 लाख 64 हजार 298 रुपये इतकी झाली आहे.
रवींद्र यांच्यावर मुंबई पोलिसांच्या आर्थिक गुन्हे शाखेकडून गुन्हा दाखल आहे. सक्तवसुली संचालनालयाची चौकशी सुरू आहे.
रवींद्र वायकर आणि त्यांची पत्नी मनीषा यांच्याकडे खेड, रत्नागिरी येथे 2.64 एकर आणि 1 एकर 15.86 गुंठे जमीन या दोन जमीन संयुक्तरित्या नावावर आहे.
मनीषा यांच्या नावावर कोर्लई, रायगड येथील 4.67 एकर जागा असून त्याचे बाजारमूल्य 2.75 कोटी रुपये इतके आहे.