Akshay Sabale
पुण्यातील काँग्रेसचे उमेदवार रवींद्र धंगेकर हे कोट्यधीश आहेत. धंगेकर आणि त्यांची पत्नी प्रतिभा यांच्याकडे एकूण 8 कोटी 16 लाख रुपयांची स्थावर व जंगम मालमत्ता आहे.
तर धंगेकरंच्या नावावर 35 लाख 73 हजार रुपयांचे कर्ज, तर पत्नीच्या नावावर 32 लाख 42 हजार रुपयांचे कर्ज असल्याचे त्यांनी उमेदवारी अर्जासोबत दिलेल्या शपथपत्रात नमूद केले आहे.
एक वर्षापूर्वी झालेल्या कसबा पेठ विधानसभा पोटनिवडणुकीत धंगेकर आणि त्यांच्या पत्नीकडे एकूण 8 कोटी 36 लाख 10 हजार रुपयांची स्थावर व जंगम मालमत्ता होती.
धंगेकर यांच्या नावावर 35 लाख 73 हजार रुपयांचे, तर पत्नीच्या नावावर 32 लाख 8 हजार रुपयांचे कर्ज होते.
लोकसभा निवडणुकीसाठी धंगेकरांनी गुरुवारी दाखल केलेल्या उमेदवारी अर्जावरून त्यांच्याकडे एकूण 4 कोटी 82 लाख 90 हजार रुपयांची स्थावर व जंगम मालमत्ता आहे.
पत्नीच्या नावे एकूण 3 कोटी 33 लाख 11 हजार रुपयांची स्थावर व जंगम मालमत्ता आहे. धंगेकर आणि त्यांच्या पत्नीकडे एकूण 8 कोटी 16 लाख रुपयांची मालमत्ता आहे.
एक वर्षात धंगेकर यांच्या एकूण मालमत्तेत 20 लाख रुपयांनी घट झाल्याचे दिसते. मात्र धंगेकर यांच्या नावावरील कर्जाची रक्कम तेवढीच आहे.
धंगेकरांची मागील आर्थिक वर्षात (2023-24) 8 लाख 7 हजार रुपये वार्षिक उत्पन्न असल्याचे नमूद केले आहे. शेती व सोने-चांदी कारागिरी असा त्यांचा व्यवसाय असल्याचे नमूद आहे.