Ganesh Sonawane
राज्यातील पहिली ते बारावीपर्यंतच्या इयत्तांना अध्यापन करणाऱ्या शिक्षकांना आता 'एआय' (कृत्रिम बुद्धिमत्ता) वापरण्याचे धडे देण्यात येणार आहेत.
त्यासाठी 'एआय साथी' हा ऑनलाइन अभ्यासक्रम विकसित करण्यात आला आहे.
शिक्षकांना हा अभ्यासक्रम केंद्र सरकारच्या 'दीक्षा' संकेतस्थळाद्वारे ३० सप्टेंबरपर्यंत पूर्ण करणे अनिवार्य करण्यात आले आहे.
राज्य शैक्षणिक संशोधन व प्रशिक्षण परिषदेचे संचालक डॉ. हेमंत वसेकर यांनी याबाबतचे परिपत्रक प्रसिद्ध केले आहे.
कृत्रिम बुद्धिमत्ता शैक्षणिक प्रशासकीय व्यवस्थेचा अविभाज्य भाग बनत आहे.
'एआय'चा योग्य, आणि सुरक्षित, जबाबदार वापर केल्यास अध्ययन-अध्यापन प्रक्रिया अधिक परिणामकारक होईल असे पत्रकात नमूद आहे.
त्यातून दैनंदिन कामकाजाची गती, गुणवत्ता, अचूकता आणि कार्यक्षमता वाढण्यास मोठी मदत होईल.
कोटक एज्युकेशन फाउंडेशनच्या सहकार्याने विकसित करण्यात आलेल्या 'एआय साथी' अभ्यासक्रमासाठी ३१ ऑगस्टपर्यंत नोंदणी करता येणार आहे.