Vijaykumar Dudhale
मावळ तालुक्यातील लोणावळा येथे जन्मलेले सुनील शेळके यांचे शिक्षण दहावीपर्यंत झाले आहे.
शेळके यांची राजकीय पार्श्वभूमी ही जनसंघ आणि राष्ट्रीय स्वयंसेवक संघाशी एकनिष्ठ अशी होती. सुनील शेळके यांची पणजी तान्हाबाई रामबा शेळके ह्या जनसंघाच्या तिकिटावर निवडून आलेल्या तळेगाव नगरपरिषदेच्या पहिल्या महिला नगरसेविका होत.
सुनील शेळके यांचे आजोबा बाळासाहेब बाबूराव शेळके हे भाजपकडून तळेगाव नगरपरिषदेचे नगरसेवक आणि नगराध्यक्ष होते. शेळके यांचे मोठे बंधू सचिन हे भाजपकडून तळेगावचे नगराध्यक्ष होते.
सुनील शेळके हे 2004 पासून भाजपमध्ये सक्रीय होते. ते 2011 मध्ये तळेगाव नगरपरिषदेत भाजपच्या तिकिटावर निवडून आले. भारतीय जनता पक्ष युवा मोर्चाचे प्रदेश उपाध्यक्ष म्हणूनही त्यांनी काम पाहिले आहे.
तळेगाव नगरपरिषदेचे भाजपचे नगराध्यक्ष म्हणून 2016 मध्ये सुनील शेळके यांची नियुक्ती झाली होती.
संघाची पार्श्वभूमी आणि भाजपमध्ये सक्रीय असणारे सुनील शेळके हे 2019 च्या विधानसभा निवडणुकीत मावळमधून इच्छूक होते. मात्र, भाजपने तत्कालीन राज्यमंत्री बाळा ऊर्फ संजय भेगडे यांना भाजपचे तिकिट दिले.
भाजपचे तिकिट बाळा भेगडे यांना जाहीर होताच सुनील शेळके यांनी राष्ट्रवादीत प्रवेश करत विधानसभेचे तिकिट मिळविले. त्यांना तिकिट देण्यात उपमुख्यमंत्री अजित पवार यांची महत्वपूर्ण भूमिका होती. अजितदादांनी भाजपसोबत जाण्याचा निर्णय घेतल्यानंतर शेळके यांनीही त्यांच्यासोबत जाण्याचा निर्णय घेतला.
राष्ट्रवादी काँग्रेसकडून विधानसभा लढविणाऱ्या सुनील शेळके यांनी भाजपचे तत्कालीन राज्यमंत्री बाळा भेगडे यांचा तब्बल 93 हजार मतांनी पराभव केला. भाजपचा बालेकिल्ला असलेल्या मावळमध्ये राष्ट्रवादीला विजय मिळवून देत शेळके हे ‘जायंट किलर’ ठरले.
देवेंद्र फडणवीस जपानमधून मानद डॉक्टरेट मिळवणारे पहिले भारतीय!