Deepak Kulkarni
राज्यात आता उन्हाळी सुट्ट्यांच्या पार्श्वभूमीवर पर्यटनासह नातेवाईकांकडे किंवा गावी जाण्याबाबतचे प्लॅन आखले जात आहे. याच दरम्यान, प्रवाशांसाठी महत्त्वाची अपडेट समोर आली आहे.
एसटी महामंडळाकडून दरवर्षीप्रमाणे यंदाही तिकीट दरात हंगामी दरवाढ करण्याचा निर्णय घेतला आहे.
महाराष्ट्र राज्य परिवहन महामंडळाकडून येत्या 15 एप्रिलपासून नवी दरवाढ लागू केली जाणार आहे. उन्हाळी सुट्ट्यांच्या हंगामातच ही वाढ केल्यानं सर्वसामान्यांना त्याची मोठी झळ सोसावी लागणार आहे.
एसटी महामंडळानं यंदा तिकीट दरात 10 टक्के वाढ जाहीर केली आहे.
एसटी प्रवाशांना आता प्रत्येक तिकीट दरासाठीच्या 100 रुपयांवर 10 रुपये जादा मोजावे लागणार आहे. सुट्ट्यांच्या हंगामात प्रवाशांची गर्दी पाहता महामंडळ दरवाढीचा निर्णय घेत असते.
15 एप्रिलपासून लागू करण्यात येणारी एसटी प्रवासासाठीची दरवाढ 15 जूनपर्यंत कायम असणार आहे.
ही दरवाढ लाल परीसह जलद बसेससाठीच लागू असणार असल्याचं एसटी महामंडळाने स्पष्ट केलं आहे.
यात महत्त्वाची बाब म्हणजे एसटी महामंडळाच्या शिवनेरी, शिवशाही, शिवाई, हिरकणी यांसह इतर स्लीपर कोच बसेसच्या तिकीट दरात कोणत्याही प्रकारची वाढ करण्यात आली नसल्याचं स्पष्ट केलं आहे.
एसटी महामंडळाकडून देण्यात येणाऱ्या महिलांना 50 टक्के तिकीट सवलत आणि ज्येष्ठ नागरिकांना मिळणारी मोफत प्रवास सवलत या काळात सुरू राहणार आहे.