Vijaykumar Dudhale
महायुतीमध्ये सातारा लोकसभेची जागा कोणत्या पक्षाला मिळणार, हे अजून स्पष्ट झाले नाही. मात्र, भाजप आणि शिवसेनेच्या इच्छुकांकडून दावे करण्यात येत आहेत. त्यातही भाजपच्या इच्छुकांनी मतदारसंघात दौरे सुरू केले आहेत.
ज्या पक्षाचा खासदार त्या पक्षाला तो मतदारसंघ असे सांगत राष्ट्रवादीचे अजित पवार यांनीही सातारा लोकसभेवर दावा सांगितला आहे.
भाजपकडून उदयनराजे भोसले हेही इच्छुक आहेत. उदयनराजे यांनी दिल्लीत तीन दिवस ठाण मांडून पक्षश्रेष्ठींकडून उमेदवारीचा शब्द आणल्याचा दावा त्यांचे समर्थक करत आहेत.
अण्णासाहेब पाटील आर्थिक विकास महामंडळाचे अध्यक्ष नरेंद्र पाटील यांनीही उपमुख्यमंत्री देवेंद्र फडणवीस यांची भेट घेऊन मतदारसंघात गाठीभेटी घेण्यास सुरुवात केली आहे.
शिवसेनेचे सातारा जिल्हाप्रमुख पुरुषोत्तम जाधव यांनीही निवडणूक लढविण्याची इच्छा व्यक्त केली आहे. त्यांनी मुख्यमंत्री एकनाथ शिंदे यांच्यासोबत उपमुख्यमंत्री अजित पवार यांचीही भेट घेतली होती.
नरेंद्र पाटील यांनी ‘आमचे दिल्लीला कोणीच नाही. उदयनराजे, तुम्ही दहा वर्षे लोकसभेचे नेतृत्व केले. राज्यसभेचेही तुम्ही नेतृत्व करत आहात. तुम्ही जसे दिल्लीला गेलात तसे आमचे मात्र दिल्लीत कोणीही नाही,’ असे सांगत सातारा लोकसभेसाठी दावेदारी केली आहे.
नरेंद्र पाटील यांना 2019 च्या निवडणुकीत शिवसेना-भाजप युतीने सातारा मतदारसंघातून लोकसभेची उमेदवारी दिली होती. त्यावेळी त्यांना चार लाख 52 हजार 498 मते मिळाली होती.
सातारा लोकसभा मतदारसंघाचा आढावा नरेंद्र पाटील यांनी नुकताच उपमुख्यमंत्री देवेंद्र फडणवीस यांना सादर केला आहे. त्यानंतर नरेंद्र पाटील साताऱ्यात सक्रिय झाले आहेत.
R