Vijaykumar Dudhale
पारनेरचे माजी आमदार नीलेश लंके यांना आज राष्ट्रवादी काँग्रेस शरदचंद्र पवार पक्षाकडून नगर दक्षिण लोकसभा मतदारसंघासाठी उमेदवारी जाहीर झाली आहे.
अजित पवारांसोबत गेल्यामुळे लोकसभा निवडणूक लढविण्यासाठी त्यांना आमदारकीचा अडथळा येत होता, त्यामुळे नीलेश लंके यांनी 29 मार्च 2024 रोजी आपल्या आमदारकीचा राजीनामा दिला होता.
राष्ट्रवादी काँग्रेसमध्ये फूट पडल्यानंतर नीलेश लंके हे अजित पवार यांच्यासोबत गेले होते. मात्र, आठवडाभरापूर्वी लंकेंनी पुण्यात शरद पवार यांची भेट घेत स्वगृही परतण्याचा निर्णय घेतला होता.
राष्ट्रवादी काँग्रेस शरदचंद्र पवार पक्षाकडून उमेदवारी जाहीर झालेले नीलेश लंके यांची लढत विद्यमान खासदार डॉ. सुजय विखे पाटील यांच्याशी होणार आहे.
आमदारकीचा राजीनामा दिल्यानंतर नीलेश लंके यांनी कार्यकर्त्यांचा मेळावा घेतला. त्यात अजित पवार यांची लंकेंनी जाहीर माफी मागितली.
याच मेळाव्यात लंकेंनी विखेंवर हल्लाबोल करताना आपण दोन लाख मतांनी निवडून येऊ, असा विश्वास व्यक्त केला. तसेच, डॉन कोण आहे, हे 13 तारखेला कळेल, आव्हानही दिले.
नीलेश लंके हे 2019 च्या निवडणुकीत विधानसभेचे तत्कालीन उपाध्यक्ष तथा शिवसेना नेते विजय औटी यांचा पराभव करून निवडून आले होते.
नगर जिल्ह्यातील काही कुटुंबांनी आम्हाला खूप त्रास दिला आहे. आमची विकासाची कामे अडविण्यात आली, अशी खदखदही नीलेश लंकेंनी या मेळाव्यात बोलून दाखवली होती.