Aslam Shanedivan
NEET पेपरफुटी प्रकरणाने अख्ख्या देशाला हादरवून सोडले असून या प्रकरणात देशभरातून ८, तर राज्यातून ४ जणांना सीबीआयने ताब्यात घेतले आहे.
जयपूरमधून तिघे, पुण्यातून दोघे, तर गुरुग्राम, नाशिक, अहिल्यानगरमधून प्रत्येकी एकाला ताब्यात घेतले असून सीबीआयने नाशिकच्या २७ वर्षीय डॉक्टर शुभम खैरनार अटक केली आहे.
यानंतर नाशिकमध्ये खळबळ उडाली असून शुभम खैरनार बोगस डॉक्टर असल्याचे समोर आले आहे. येथील एका व्यावसायिक संकुलात स्वतःचे कार्यालय थाटले होते.
स्वतःला डॉक्टर म्हणवून घेणारा शुभम खैरनार वैद्यकीय शिक्षण घेणाऱ्या हजारो विद्यार्थींना समुपदेशन करत असे. यातूनच त्याने लाखो रुपयांची माया जमवल्याचा आरोप होत आहे.
शुभम खैरनारने २०२१ साली भोपाळमधील सेहोर येथील श्री सत्य साई विद्यापीठात BAMS प्रवेश घेतला होता. मात्र त्याने शिक्षण पूर्ण केले नाही.
शुभम खैरनारने नीट परीक्षेची प्रश्नपत्रिका १० लाख रुपयांत विकत घेऊन ती १५ लाख रुपयांना विकल्याचा आरोप आहे.
खैरनार मुळचा नाशिकच्या नांदगावमधील रहिवासी असून त्याचे वडील मधुकर खैरनार देखील डॉक्टर म्हणून ओळखले जातात. ते आयुर्वेदिक पद्धतीने रुग्णांवर उपचार करतात.
शुभमचा लहान भाऊ भावेश खैरनार हाही याच व्यवसायाशी निगडित असून त्याची फार्मसी आणि प्रयोगशाळा आहे. त्याच्याकडे गावठी पिस्तूल आढळून आल्याने त्याला अटक करण्यात आली होती.