Deepak Kulkarni
3 मे रोजी झालेली नीटची परीक्षा पेपरफुटीच्या घटनांमुळे रद्द करण्यात आली होती.
यानंतर एनटीएकडून पेपरफुटीमुळे रद्द झालेली NEET ची पुर्नपरीक्षा 21 जून 2026 रोजी होणार असल्याचं जाहीर करण्यात आलं होतं.
पेपरफुटीमुळे नीट परीक्षा रद्द झाल्यानं मोठी खळबळ उडाली होती. वर्षभर या परीक्षेची तयारी केलेल्या विद्यार्थी आणि पालकांमध्ये संतापाची लाट उसळली होती.
एनटीएकडून आता 21 जून रोजी होत असलेल्या नीटच्या परीक्षेबाबत महत्त्वाचा निर्णय घेण्यात आला आहे.
परीक्षार्थी विद्यार्थ्यांना 15 मिनिटांचा अतिरिक्त वेळ देण्यात येणार असल्याची माहिती नॅशनल टेस्टिंग एजन्सीने (NTA) दिली आहे.
नवीन बदलानुसार, आता परीक्षेचा सुधारित कालावधी हा दुपारी 2.00 ते 5.15 या असणार असून एकूण 195 मिनिटे विद्यार्थ्यांना मिळणार आहे.
तसेच प्रश्नपत्रिकेच्या सुरुवातीला आणि शेवटी मिळून रफ कामासाठी पानांची संख्याही 2 ने वाढवली असून ती आता थेट 4 करण्यात आली आहे.
पेपरफुटीचा विद्यार्थ्यांना जो शारीरिक-मानसिक त्रास सहन करावा लागला, त्या पार्श्वभूमीवर एनटीएनं हा निर्णय घेतला आहे.
नीट पेपर फुटीप्रकरणी देशभरातून आतापर्यंत सुमारे 50 हून अधिक जणांना अटक करण्यात आली आहे. सीबीआयने 12 मे रोजी तपास हाती घेतल्यानंतर दिल्ली, हरियाणा (जयपूर-गुरग्राम) आणि महाराष्ट्रातील (पुणे-नाशिक-लातूर) मुख्य सूत्रधारांसह टोळ्यांवर धडक कारवाया केल्या आहेत.