Rajanand More
मागील काही दिवसांपासून भारत आणि पाकिस्तानमध्ये मोठा संघर्ष सुरू होता. दोन्ही देशांकडून एकमेकांवर हल्ले करण्यात आले. यामध्ये पाकची त्रेधातिपिट उडाली. भारताने पाकला चांगलीच अद्दल घडवली.
दोन्ही देशांमध्ये शस्त्रसंधी झाल्याने संघर्ष थांबला. त्यातच पाकमधील बलुचिस्तान प्रांतातील एका 25 वर्षीय हिंदू तरूणीने इतिहास घडवला आहे.
कशिशने बलुचिस्तान लोकसेवा आयोगाची परीक्षा उत्तीर्ण केली आहे. तिची सहायक आयुक्तपदी नियुक्ती झाली असून ती हे पद मिळविणारी पहिली हिंदू महिला ठरली आहे.
लोकसेवा आयोगाच्या परीक्षेसाठी कशिश यांनी सतत तीन वर्षे अभ्यास केला होता. अखेर त्यांच्या कष्टाचे चीज झाले आहे.
कशिश या बलुचमधील चागई जिल्ह्यातील नौशकी या दुर्गम भागातील रहिवासी आहेत. नियुक्तीनंतर कशिश व त्यांचे वडील मुख्यमंत्री सरफराज बुगती यांना भेटण्यासाठी क्वेटा येथे गेले होते.
पाकिस्तानातील अनेक हिंदू तरूणींसाठी आता त्या प्रेरणा बनल्या आहेत. ही पदे महिलांसाठी आवक्याबाहेर मानली जात होती.
कशिश यांचे वडील गिरधारी लाल यांनी मुलीच्या या यशाबद्दल आनंद व्यक्त केली. ही आपल्यासाठी अभिमानाची बाब असल्याचे त्यांनी सांगितले.
मुख्यमंत्र्यांनीही कशिश यांचे कौतुक केले. अल्पसंख्यांक समाजातील व्यक्तीने समर्पण आणि परिश्रमाद्वारे अशा पदांवर पोहचणे म्हणजे बलुचिस्तानसाठी अभिमानाचे प्रतिक असल्याचे ते म्हणाले.