Rashmi Mane
नोकरी करणाऱ्या बहुतांश लोकांचे पीएफ खाते असते. या खात्यात प्रत्येक महिन्याला पगाराचा ठराविक रक्कम जमा होते आणि त्याचप्रमाणे कंपनीकडूनही रक्कम जमा केली जाते.
त्यामुळे हा निधी एक प्रकारचा सेव्हिंग अकाऊंटसारखाच मानला जातो. या खात्यावर व्याजदेखील मिळते.
मात्र पीएफमधील पैसे काढण्यासाठी आतापर्यंत ऑनलाईन क्लेम करावा लागत होता. आणि त्याची प्रक्रिया पूर्ण होण्यासाठी 4-5 दिवस लागायचे.
पण आता कर्मचारी भविष्य निधी संघटना (EPFO) आपल्या सभासदांसाठी मोठा बदल करण्याच्या तयारीत आहे.
लवकरच पीएफमधील पैसे थेट एटीएममधून काढण्याची सुविधा मिळणार आहे. ही नवी सुविधा EPFO 3.0 उपक्रमाचा एक महत्त्वाचा भाग असेल.
याबाबतची अंतिम घोषणा सेंट्रल बोर्ड ऑफ ट्रस्टीजच्या पुढील बैठकीत होणार आहे. मंजुरी मिळाल्यानंतर ही योजना अमलात आणली जाईल. त्यामुळे सदस्यांना पैशांसाठी अनेक दिवस वाट पाहावी लागणार नाही, तर क्लेम मंजूर झाल्यानंतर लगेचच एटीएममधून रक्कम काढता येईल.
EPFO आपल्या सदस्यांना स्पेशल एटीएम कार्ड देऊ शकते. हे कार्ड थेट पीएफ खात्याशी लिंक केलेले असेल. हे कार्ड वापरून कुठल्याही एटीएममधून पैसे काढू शकतील.
या निर्णयाचा फायदा देशातील जवळपास 7.8 कोटी सभासदांना होणार आहे. आपत्कालीन परिस्थितीत कर्मचारी त्वरित पैसे मिळवू शकतील. आतापर्यंत पीएफची रक्कम येण्यास काही दिवस लागत असल्याने अडचणी निर्माण होत होत्या. मात्र या नव्या योजनेमुळे ही प्रक्रिया सोपी होणार आहे.