Sachin Fulpagare
लोकसभा निवडणुकीत एनडीएला 400 हून अधिक खासदार निवडून आणायचे आहेत. यासाठी भाजपला 370 चा पल्ला गाठायचाच आहे, असे म्हणत मोदींनी भाजप कार्यकर्त्यांना निवडणुकीचे टार्गेट दिले.
पंतप्रधान मोदींनी यावेळी काँग्रेसवर निशाणा साधला. काँग्रेस म्हणजे अस्थिरता, घराणेशाही आणि जातीयवादाची जननी आहे. काँग्रेस अजूनही कटकारस्थान रचते आहे, असा आरोप मोदींनी केला.
'विरोधकांची खोटी आश्वासनं'
विरोधी पक्ष योजना पूर्ण करत नाहीत. खोटी आश्वासनं देण्यात यांचा हात कोणीच धरू शकत नाही. मात्र, 'विकसित भारत' ही आपली ग्वाही आहे, असे म्हणत मोदींनी विरोधकांवर टीका केली.
लोकसभा निवडणुकीसाठी पुढील 100 दिवस आपल्या सर्वांना एकजुटीने काम करायचे आहे. प्रत्येक मतदार, लाभार्थी आणि समाजातील प्रत्येक घटकापर्यंत पोहोचाये आहे, असे मोदी म्हणाले.
छत्रपती शिवाजी महाराज हे आमचे आदर्श आहेत. राज्याभिषेक झाल्यानंतर महाराजांनी सत्तेचा आनंद घेतला नाही. त्यांनी आपली मोहीम सुरूच ठेवली. तसेच मी सुख-वैभवासाठी जगणारा व्यक्ती नाही, असे त्यांनी स्पष्ट केले.
भाजप सरकारची तिसरी टर्म ही सत्ता भोगण्यासाठी मागत नाहीये. मी देशाच्या विकासाचा संकल्प घेऊन निघालो आहे, असे मोदी पुढे म्हणाले.
आता देश छोटी स्वप्नं पाहणार नाही आणि छोटे संकल्प सोडणार नाही. आता स्वप्नंही भव्य असतील आणि संकल्पही. आपले स्वप्नं हे विकसित भारताचे आहे, असे त्यांनी सांगितले.