Rashmi Mane
भारतीय जनता पक्षाने उत्तर प्रदेशातील 10 राज्यसभा जागांच्या आगामी निवडणुकीसाठी आठ उमेदवारांची नावे जाहीर केली आहेत. त्यामध्ये प्रियंका सिंह रावत यांच्या नावाची सर्वाधिक चर्चा आहे.
प्रियंका सिंह रावत यांनी 2014 मध्ये बाराबंकी लोकसभा मतदारसंघातून ऐतिहासिक विजय मिळवला होता. त्यांनी काँग्रेसचे दिग्गज नेते पी.एल. पुनिया यांचा तब्बल 2,11,000 मतांनी पराभव केला होता.
भाजपने 16 मार्च 2014 रोजी अवघ्या 28व्या वर्षी प्रियंका यांना उमेदवारी दिली. पहिल्याच मोठ्या निवडणुकीत त्यांनी जोरदार विजय मिळवत ‘जायंट किलर’ अशी ओळख निर्माण केली.
प्रियंका यांचा जन्म 7 ऑगस्ट 1985 रोजी बरेली येथे झाला. त्यांनी राज्यशास्त्र विषयात पदव्युत्तर शिक्षण घेतले. त्यानंतर मास कम्युनिकेशन आणि इलेक्ट्रॉनिक जर्नलिझमचा डिप्लोमा केला.
विद्यापीठात शिक्षण घेत असतानाच प्रियंका राजकारणाकडे वळल्या. विद्यार्थी जीवनात त्यांची लायब्ररी इन्चार्ज म्हणूनही निवड झाली होती.
खासदार म्हणून प्रियंका यांनी अन्न, ग्राहक व्यवहार आणि सार्वजनिक वितरण समितीत काम केले. महिला व बालविकास मंत्रालयाच्या सल्लागार समितीतही त्यांनी सहभाग घेतला.
प्रियंका यांचे वडील उत्तम राम सिंह निवृत्त PCS अधिकारी आहेत. 2007 मध्ये त्यांचा IRS अधिकारी रघुनाथ रावत यांच्याशी विवाह झाला. त्यांना दोन मुली आहेत.
राज्यसभेच्या माध्यमातून प्रियंका रावत यांना पुन्हा राष्ट्रीय राजकारणात सक्रिय करण्याचा भाजपचा प्रयत्न मानला जात आहे. त्यांच्या एन्ट्रीमुळे उत्तर प्रदेशातील राजकीय समीकरणांनाही नवी दिशा मिळू शकते.