Rajanand More
केरळ विधानसभा निवडणुकीत काँग्रेस आघाडीने सत्ता काबीज केली आहे. या निवडणुकीत एक ऐतिहासिक घटनाही घडली आहे.
फातिमा तहिलिया या काँग्रेसचा मित्रपक्ष असलेल्या इंडियन युनियन मुस्लिम लीग (IUML) या पक्षाच्या देशातील पहिल्या महिला आमदार म्हणून निवडून आल्या आहेत. त्यांनी केरळमधील पेरांबरा मतदारसंघातून विजयी होत इतिहास घडविला आहे.
३४ वर्षीय फातिमा यांनी CPI(M) पक्षाचे दिग्गज नेते टी. पी. रामकृष्णन यांना पराभूत केले. त्यामुळे त्या जायंट किलरही ठरल्या आहेत. व्यवसायाने वकील असलेल्या फातिमा कोझिकोड महानगरपालिकेत नगरसेवकही होत्या.
लोकसभेतील विरोधी पक्षनेते राहुल गांधी यांनीही फातिमा यांच्या प्रचारासाठी सभा घेतली होती. तसेच त्यांच्या विजयासाठीही त्यांनी काँग्रेसच्या स्थानिक पदाधिकाऱ्यांनाही कामाला लावल्याचे सांगितले जाते.
फातिमा या विद्यार्थी असल्यापासूनच आक्रमक होत्या. हिजाबसह विद्यार्थ्यांशी संबंधित अनेक मुद्यांवर त्यांनी महाविद्यालयात असताना आंदोलनात सहभाग घेतला आहे. सध्या त्या त्या IUML च्या मुस्लिम यूथ लीगच्या सचिव आहेत.
पक्षांतर्गत लैंगिक समानता आणि महिलांच्या प्रतिनिधित्वाचा मुद्दाही फातिमा यांनी उपस्थित केला होता. पक्षातील काही नेत्यांविरोधातील लैंगिक छळाच्या आरोपांवर त्यांनी थेट भूमिका घेतल्याने केरळमध्ये चर्चेत आल्या होत्या.
IUML च्या ७५ वर्षांच्या इतिहासात क्वचितच महिलांना संधी दिली गेली. त्यातही फातिमा या एकमेव आमदार बनल्या आहेत. त्यामुळे आता त्या पक्षाच्या एकप्रकारे सुधारणावादी चेहरा बनल्या आहेत.
केरळच्या मंत्रिमंडळातही फातिमा यांचा त्यामुळे समावेश होण्याची शक्यता आहे. राहुल गांधी यांच्याकडूनच त्यासाठी आग्रह धरला जाऊ शकतो, अशी चर्चा आहे.