Sachin Fulpagare
महाराष्ट्राचे माजी मुख्यमंत्री आणि काँग्रेस नेते अशोक चव्हाण यांनी भाजपमध्ये प्रवेश केला. आता कमलनाथही भाजपच्या वाटेवर असल्याची चर्चा आहे.
कमलनाथ यांच्या नेतृत्वात मध्य प्रदेशात काँग्रेसने विधानसभा निवडणूक लढवली. पण या निवडणुकीत काँग्रेसचा दारुण पराभव झाला. या पराभवाचं खापर कमलनाथ यांच्यावर फोडण्यात आलं. यामुळे कमलनाथ नाराज होते.
कमलनाथ हे पुत्र नकुलनाथसह भाजपमध्ये जाणार असल्याची चर्चा आहे. या पार्श्वभूमीवर कमलनाथ यांचे निकटवर्तीय काँग्रेस नेते सज्जन सिंह यांनी दिल्लीत त्यांच्या निवासस्थानी पोहोचले. त्यांनी कमलनाथ यांच्याशी चर्चाही केली.
या सर्व राजकीय घडामोडींच्या पार्श्वभूमीवर राहुल गांधी यांनी कमलनाथ यांच्याशी फोनवर चर्चा केल्याचं सांगण्यात येत आहे.
राहुल गांधी यांनी फोन करून कमलनाथ यांचं मन वळण्याचा प्रयत्न केल्याचं बोललं जात आहे. कमलनाथ आजही काँग्रेसमध्ये आहेत आणि उद्याही राहतील, असं त्यांचे निकटवर्तीय सज्जन सिंह म्हणाले.
कमलनाथ आणि नकुलनाथ यांच्या भाजप प्रवेशावरून सस्पेन्स कायम आहे. चर्चांदरम्यान कमलनाथ हे दिल्लीत दाखल झालेत.
खासदार नकुलनाथ यांनी आपल्या ट्विटर हँडलवरून काँग्रेसचा उल्लेख हटवला आहे. नकुलनाथ हे मध्य प्रदेशातील छिंदवाडा मतदारसंघातून काँग्रेसचे खासदार आहेत.