Aslam Shanedivan
राज्यातील पोलिस खाते भारत सरकार, राज्य सरकार,पत्रकार, पोलिस, आर्मी असे लोगो किंवा लिहलेल्या अक्षरांच्या गाड्यांवर चौकशी अंती कारवाई करताना दिसते. MLA Logo
पण काही ठिकाणी आमदार, खासदार, लोकसभा राज्यसभा, विधानसभा किंवा विधानपरिषद सदस्य असे लोगो किंवा स्टिकर्स असलेल्या गाड्याही फिरताना दिसल्या आहेत.
या गाड्यांवर कारवाई झाल्याचे आतापर्यंत समोर आलेले नाही. असाच एक प्रकार रायगडमध्ये देखील समोर आला आहे.
रायडगमध्ये एकनाथ शिंदे यांच्या शिवसेनेचे जिल्हाध्यक्ष राजा केणी यांनी आपल्या डिफेंडर गाडीवर आमदार असणारा लोगो लावल्याने आता चर्चा सुरू झाली आहे. तर असा लोगो लावता येतो का? याचे नियम काय असे प्रश्न विचारले जात आहेत.
महाराष्ट्रात विधानसभेतील 288 सदस्य आणि विधान परिषदेतील 78 सदस्यांनाच शासकीय कामासाठी त्यांच्या गाडीवर आमदार असा लोगो लावण्याचा अधिकार आहे. हा अधिकार फक्त अधिकृत आमदार आणि विधान परिषदेच्या सदस्यांनाच असतो.
विधानसभा सदस्य अर्थात आमदार असलेल्या व्यक्तीला आपल्या वाहनावर त्यांच्या पदाचा उल्लेख असलेले स्टिकर लावण्याची मुभा आहे. जे विधीमंडळाचे अधिवेशन सत्राच्या कालावधीसाठी असते
तसेच असे स्टिकर लावण्यात आलेल्या वाहनाची संबंधित आमदाराच्या नावाने 'आरटीओ' दफ्तरी नोंद असणेही आवश्यक असते.
तसे नसल्यास तो कायदेभंग ठरू शकतो. खासगी वाहनांवर खासदार किंवा आमदारांचे स्टिकर लावणे, हे मोटार वाहन कायद्याचे उल्लंघन आहे.