Deepak Kulkarni
राज्यात नगर परिषदा आणि नगरपंचायत निवडणुकांच्या निकालात महायुतीतील भाजपसह शिवसेना आणि अजित पवारांच्या राष्ट्रवादी काँग्रेसनं दमदार कामगिरी करत 288 पैकी 221 नगरपालिका जिंकल्या आहेत. भाजपने 124 नगराध्यक्षांसह सर्वात मोठा पक्ष होण्याचा बहुमान मिळवला आहे.
सातारा नगरपालिकेच्या निवडणुकीतही भाजपनं महाविकास आघाडीला पराभवाचा धक्का देत मोठं यश मिळवलं.
खासदार उदयनराजे आणि मंत्री शिवेंद्रराजे भोसले यांची ताकद मिळाल्यामुळे सातारा नगरपालिकेतील भाजपचा उमेदवार राज्यातलं सर्वात विक्रमी मताधिक्य मिळवत विजयी झाला
सातारा पालिकेच्या निवडणुकीत राजेंच्या मनोमिलन पॅटर्ननुसार लढती झाल्या होत्या. त्यांच्या या पॅटर्नला बहुतांश ठिकाणी बंडखोरांनी आव्हान दिले होते.
या निवडणुकीत महत्त्वाची बाब म्हणजे उदयनराजे भोसले आणि शिवेंद्रसिंहराजे भोसले यांचे समर्थक आघाड्यांऐवजी भाजपकडून लढत असल्याचं दिसून आलं.
सातारा नगरपालिका निवडणुकीत दोन्ही राजांचा करिष्मा दिसल्यानं भाजपचे नगराध्यक्षपदाचे उमेदवार अमोल मोहिते यांनी 42 हजार 32 मतांनी महाविकास आघाडीच्या सुवर्णा पाटील यांना पराभूत केलं.
भाजप उमेदवार अमोल उदयसिंह मोहिते यांना 57 हजार 587 एवढे तर महाविकास आघाडीच्या उमेदवार सुवर्ण पाटील यांना 15 हजार 555 मतदान झालं.
सातारा जिल्ह्यातील 9 नगरपालिका आणि एका नगरपंचायतीची निवडणुकीसाठी चुरशीच्या लढतीत दोन्ही राजेंसह अनेक प्रमुख नेत्यांची प्रतिष्ठा पणाला लागली होती.
अमोल मोहितेंसह सातारा जिल्ह्यात सर्वाधिक नगराध्यक्ष भाजपचेच विजयी झाल्याची माहिती निकालातून समोर आलं आहे.