Deepak Kulkarni
सौदी अरेबियाच्या 29 वर्षीय राजकुमार अब्दुल्ला बिन फहद बिन अब्दुल्ला बिन अब्दुलअजीज बिन जलावी अल सऊद यांचा गेल्या वर्षी मृत्यू झाला होता.
ते सौदी अरेबियाच्या सत्ताधारी 'हाऊस ऑफ सऊद' या राजघराण्याचे सदस्य होते.
लंडनमधील एका आलिशान हॉटेलमध्ये आठवडाभराच्या मुक्कामादरम्यान सौदी अरेबियाच्या राजघराण्यातील तरुण सदस्याचा दुर्दैवी मृत्यू झाल्यानं एकच खळबळ उडाली होती.
ही घटना 25 नोव्हेंबर 2025 रोजी लंडनमधील मॅरियट हॉटेल, केन्सिंग्टन येथे घडली होती. आता या मृत्यूबद्दलचा निष्कर्ष समोर आला आहे.
या सौदी अरेबियाच्या प्रिन्सच्या मृत्यू प्रकरणाची यूकेमधील तपास अधिकारी कोरोनर यांच्या चौकशीत काही धक्कादायक बाब समोर आली आहे.
प्रिन्स अब्दुल्ला बिन फहद बिन अब्दुल्ला बिन अब्दुलअजीज बिन जलावी अल सऊद (वय 29) यांचा मृत्यू मद्य, पार्टी ड्रग GHB (गॅमा-हायड्रॉक्सीब्युटिरेट) आणि डॉक्टरांनी लिहून दिलेल्या चिंतानाशक (अँटी-अँझायटी) औषधांचे धोकादायक मिश्रण सेवन केल्यामुळे झाल्याचं म्हटलं आहे.
तपासादरम्यान, सौदी अरेबियाच्या राजकुमाराच्या मृत्यूमागं आत्महत्या किंवा कोणत्याही प्रकारच्या घातपाताचे पुरावे आढळले नसल्याचा निष्कर्ष नोंदवण्यात आला आहे.
अब्दुल्ला हे जरी राजघराण्यातील एका प्रतिष्ठित कुटुंबाशी संबंधित असले तरी त्यांचा सार्वजनिक जीवनात अत्यंत कमी वावर होता.