Rajanand More
मध्य प्रदेशचे माजी मुख्यमंत्री शिवराज सिंह चौहान यांच्याकडे पंतप्रधान नरेंद्र मोदी यांनी आपल्या तिसऱ्या टर्ममध्ये कृषी मंत्रिपदाची जबाबदारी सोपवली आहे.
शिवराज सिंह चौहान यांना शेतीची प्रचंड आवड असून ते स्वत: अजूनही शेतामध्ये फेरफटका मारताना दिसतात. कधी ट्रॅक्टर चालवतानाचे त्यांचे फोटो व्हायरल होतात.
मध्य प्रदेशातील विदिशा हे त्यांचे गाव असून तिथेच त्यांची शेती आहे. या शेतात भलेमोठे फॉर्महाऊस असून त्यावरून काँग्रेसकडून त्यांच्यावर टीकाही केली जाते.
चौहान यांच्या शेतामध्ये टोमॅटो, शिमला मिरची, दुधी भोपळा, लाल भोपळा या फळभाज्यांसह झेंडू व इतर फुलांची शेतीही आहे. शेती उत्पादनातून ते लाखो रुपये कमावतात.
कृषी मंत्री अनेकदा शेतात फेरफटका मारताना दिसतात. कधी पत्नीसोबत तर कधी शेतात काम करणाऱ्या मंजुरांसोबत त्यांचे फोटो समोर येत असतात.
शेतामध्ये काम करताना अद्भूत आनंद मिळतो, अशी भावना ते व्यक्त करतात. त्यामुळे शेतात सातत्याने येत असल्याचेही ते सांगतात.
चौहान यांचा साधेपणा सर्वांनाच भावतो. मध्य प्रदेशात त्यांना मामा असे संबोधले जाते. शेतामधील त्यांचा अत्यंत सहज वावरही या साधेपणाचाच एक भाग आहे.
शेतीशी संबंधित माहितीचा खजिनाच चौहान यांच्याकडे आहे. कृषिमंत्री म्हणून संसदेत आणि संसदेबाहेर भाषण करताना त्याची नेहमीच प्रचिती येते. वृक्षारोपणावरही त्यांचा भर असतो.