Vijaykumar Dudhale
काँग्रेस नेते दिलीप माने यांनी 2009 च्या निवडणुकीत दक्षिण सोलापूर मतदारसंघातून विधानसभेची निवडणूक लढवली होती. त्या निवडणुकीत ते विजयी झाले होते.
मोदी लाटेत झालेल्या 2014 च्या विधानसभा निवडणुकीत दक्षिण सोलापूर मतदारसंघात दिलीप माने यांचा भाजपचे सुभाष देशमुख यांच्याकडून पराभव झाला होता.
दिलीप माने यांनी 2019 मध्ये शिवसेनेत प्रवेश केला. मात्र, त्यांना त्यांचा हक्काचा दक्षिण सोलापूर मतदारसंघ सोडून सोलापूर शहर मध्य मतदारसंघातून विधानसभेची निवडणूक लढवावी लागली. त्या निवडणुकीत त्यांचा प्रणिती शिंदे यांच्याकडून पराभव झाला.
सोलापूर शहर मध्य मतदारसंघातील पराभवानंतर दिलीप माने हे पक्षीय राजकारणासून काहीकाळ अलिप्त होते. मात्र, त्यांनी दक्षिण सोलापूरमधून विधानसभेसाठी पुन्हा रणशिंग फुंकले होते. पण त्यांचा पक्ष ठरत नव्हता.
महाविकास आघाडीकडून लोकसभा निवडणुकीची तयारी सुरू झाल्यानंतर ते आघाडीशी कनेक्ट झाले आणि त्यानंतर थोड्याच दिवसांत ते काँग्रेसमध्ये प्रवेश करणार हे निश्चित झाले होते.
प्रदेशाध्यक्ष नाना पटोले, ज्येष्ठ नेते सुशीलकुमार शिंदे यांच्या उपस्थितीत मुंबईतील टिळक भवनात दिलीप माने यांनी आज काँग्रेस पक्षात अधिकृतपणे प्रवेश केला.
लोकसभा निवडणुकीत माने यांच्या संघटनात्मक ताकदीचा प्रणिती शिंदे यांना फायदा होऊ शकतो. मात्र, दिलीप माने यांचे लक्ष्य विधानसभा आहे.
काँग्रेस नेतृत्व तथा सुशीलकुमार शिंदे यांच्याकडून त्यांना विधानसभेचा शब्द मिळाला आहे का, याची उत्सुकता माने यांच्या कार्यकर्त्यांना आहे.