Rashmi Mane
एसटी महामंडळात मोठ्या प्रमाणावर भरतीची घोषणा झाली आहे. राज्यभरातील हजारो युवक-युवतींसाठी ही मोठी संधी ठरणार आहे. जवळपास 18 हजार पदांसाठी लवकरच मेगाभरती करण्यात येणार असल्याची घोषणा केली आहे.
महाराष्ट्र राज्य मार्ग परिवहन महामंडळ अनेक वर्षे आर्थिक अडचणीत होतं. मात्र महायुती सरकार सत्तेत आल्यानंतर महिलांसह ज्येष्ठ नागरिकांना तिकीट दरात सवलत दिली गेली. त्यामुळे एसटी प्रवासाला पुन्हा मोठ्या प्रमाणावर प्रतिसाद मिळू लागला.
प्रवाशांची संख्या वाढल्यामुळे एसटी सेवेला नवी उभारी मिळाली आहे. वाढत्या प्रवासीसंख्येमुळे बससेवा अधिक सक्षम करण्यासाठी मनुष्यबळ वाढवण्याची गरज निर्माण झाली आहे.
परिवहन मंत्री प्रताप सरनाईक यांनी विधान परिषदेत मोठी घोषणा करत सांगितले की एसटी महामंडळात 17,742 पदांची मेगा भरती करण्यात येणार आहे. त्यामुळे रोजगाराच्या नव्या संधी निर्माण होणार आहेत.
एसटी महामंडळ दरवर्षी 5,000 नवीन बसेस खरेदी करण्याचे धोरण राबवत आहे. त्यामुळे बससेवा वाढवण्यासाठी चालक, वाहक आणि इतर कर्मचाऱ्यांची गरज मोठ्या प्रमाणात भासणार आहे.
या पार्श्वभूमीवर होणारी ही भरती कंत्राटी पद्धतीने केली जाणार असल्याची माहिती परिवहन मंत्र्यांनी दिली. लवकरच याबाबत अधिकृत प्रक्रिया सुरू होण्याची शक्यता आहे.
2022 मध्ये झालेल्या एसटी कर्मचाऱ्यांच्या दीर्घ संपाच्या काळात सेवा बजावलेल्या कंत्राटी कर्मचाऱ्यांना या भरतीत विशेष प्राधान्य देण्याचा निर्णयही सरकारने घेतला आहे.
सध्या एसटीच्या ताफ्यात 14,000 पेक्षा अधिक बसेस आहेत. सरकारने दरवर्षी 5,000 बसेस खरेदी करण्याचे लक्ष्य ठेवले आहे. त्यामुळे एसटी सेवा अधिक मजबूत करण्यासाठी ही मेगा भरती महत्त्वाची ठरणार आहे.