Rajanand More
माजी आयएएस अधिकारी सुजाता राऊत कार्तिकेयन यांनी नुकताच बिजू जनता दलामध्ये प्रवेश केला. माजी मुख्यमंत्री व पक्षाचे प्रमुख नवीन पटनायक यांनी त्यांचे पक्षात स्वागत केले.
सुजाता या माजी सनदी अधिकारी व्ही. के. पांडियन यांच्या पत्नी आहेत. पांडियन हेही स्वेच्छानिवृत्तीनंतर बिजू जनता दलामध्ये सक्रीय होते. पटनायक यांचे अत्यंत विश्वासू सहकारी मानले जात होते.
पांडियन यांनी २०२४ मधील विधानसभा व लोकसभा निवडणुकीत पक्षाचा पराभव झाल्यानंतर थेट राजकारणातून संन्यास घेतला.
आता पत्नी सुजाता यांनी राजकारणात प्रवेश करत पतीच्या पावलावर पाऊल टाकले आहे. त्यांनी मार्च २०२५ मध्ये स्वेच्छानिवृत्ती घेतली आहे.
सुजाता या पटनायक सरकारमध्ये वरिष्ठ अधिकारी म्हणून अनेक वर्षे सक्रीय होत्या. त्या ओडिशा केडरच्या २००० बॅचच्या आयएएस अधिकारी होत्या.
राज्यातील ममता योजनेत त्यांची महत्त्वाची भूमिका होती. सामाजिक कल्याण संचालक म्हणून त्यांनी या योजनेची अत्यंत प्रभावीपणे अंमलबजावणी केली.
महिलांच्या सक्षमीकरणासाठीच्या मिशन शक्ती या महत्त्वाकांक्षी योजनेचे नेतृत्व करत त्यांनी सुमारे ७० लाख महिलांचे जाळे उभे केले होते.
राज्यात भाजपची सत्ता आल्यानंतर त्यांनी वर्षभरातच स्वेच्छानिवृत्ती घेतली. तेव्हापासूनच त्या राजकारणात प्रवेश करणार असल्याची जोरदार चर्चा होती. त्यानुसार त्यांनी नुकताच बीजेडीमध्ये प्रवेश केला.