Aslam Shanedivan
सतीश कुमार कृष्णप्रसाद केसरी या तरूणाचे आयएएस अधिकारी होण्याचे स्वप्न होते. मात्र, त्यात यश मिळाले नाही.
ज्यानंतर नशीब आजमावण्यासाठी तो लोकप्रिय टीव्ही शो 'कौन बनेगा करोडपती'मध्येही गेला. मात्र 'फास्टेस्ट फिंगर फर्स्ट' फेरीपलीकडे त्याला मजल मारता आली नाही
येथेच सतीश कुमारचे हॉट सीटवर बसण्याचे स्वप्न अपूर्णच राहिले. पुढे त्याचे ट्रॅव्हल व्यवसायात नशीब आजमावले; मात्र तिथेही मोठे नुकसान झाले.
वाढते कर्ज आणि आर्थिक संकटामुळे अखेर या तरुणाने गुन्हेगारीचा मार्ग निवडल्याचा धक्कादायक प्रकार समोर आला आहे.
मूळचा बिहारचा रहिवासी आणि कॉम्प्युटर सायन्समध्ये बीटेक पदवी घेतलेल्या सतीशने मुंबईतील कांदिवली पश्चिम परिसरातील एका नामांकित ज्वेलर्सच्या दुकानात दरोडा टाकला.
५ लाख रुपये किमतीची सोन्याची साखळी लंपास केल्याप्रकरणात कांदिवली पोलिसांनी गुन्हा दाखल करत त्याला अटक केली.
कर्जाची परतफेड करणे अशक्य झाल्याने त्याने शॉर्टकटने पैसे कमावण्यासाठी चोरीचा मार्ग स्वीकारल्याचे तपासातून समोर आल्याचे सांगितले जात आहे.
सतीशने चोरी करण्यासाठी वेगळीच पद्धत अवलंबली होती. तो नामांकित ज्वेलर्सच्या दुकानात ग्राहक बनून जायचा आणि संधी साधत दागिने लंपास करायचा.
सोन्याची साखळी चोरल्यानंतर पोलिसांना गुंगारा देण्यासाठी सतीशने बनावट कागदपत्रे तयार केली होती. तसेच डुप्लिकेट ओळखपत्राचाही वापर ही करत असे.